اسلام آباد: نیشنل ڈیزاسٹر منیجمنٹ اتھارٹی (این ڈی ایم اے) نے 23 سے 30 اگست تک ملک کے مختلف علاقوں میں شدید بارشوں اور ممکنہ سیلابی صورتحال کے پیش نظر الرٹ جاری کردیا ہے۔
رپورٹ کے مطابق اس دوران اسلام آباد، کشمیر، خیبرپختونخوا اور پنجاب کے کئی اضلاع میں بارشیں متوقع ہیں، جن میں راولپنڈی، اٹک، جہلم، میانوالی، خوشاب، سرگودھا، سیالکوٹ، گجرات اور حافظ آباد شامل ہیں۔ خیبرپختونخوا کے اضلاع چترال، دیر، سوات، شانگلہ، مانسہرہ، بٹگرام، ایبٹ آباد، مالاکنڈ، پشاور، چارسدہ، نوشہرہ، مردان، ٹانک، بنوں اور لکی مروت میں بھی 23 سے 30 اگست تک بارشوں کی پیش گوئی کی گئی ہے۔
گلگت بلتستان کے علاقوں گلگت، اسکردو، ہنزہ، غذر، دیامر، استور، گانچھے اور شگر میں بھی شدید بارشوں کا امکان ہے، جس سے پہاڑی علاقوں میں لینڈ سلائیڈنگ اور رابطہ سڑکوں کے متاثر ہونے کا خدشہ ہے۔ سندھ میں 27 سے 30 اگست تک کراچی سمیت ٹھٹہ، سجاول، بدین، تھرپارکر، حیدرآباد، جامشورو، نوابشاہ، دادو، خیرپور، سکھر، گھوٹکی اور لاڑکانہ میں بارشیں متوقع ہیں۔ اسی طرح جیکب آباد، شکارپور، کشمور اور شہید بینظیر آباد بھی متاثر ہوسکتے ہیں۔
بلوچستان میں لسبیلہ، خضدار، آواران، قلات، گوادر، تربت، کیچ، پنجگور، کوئٹہ، زیارت، ژوب، لورالائی، بارکھان، موسیٰ خیل، ڈیرہ بگٹی اور کوہلو میں 27 سے 30 اگست تک موسلا دھار بارشوں کی پیش گوئی کی گئی ہے۔ این ڈی ایم اے کے مطابق دریائے سندھ میں تونسہ، گڈو اور کالاباغ کے مقام پر پانی کا بہاؤ 5 لاکھ کیوسک تک پہنچ سکتا ہے جبکہ دریائے راوی اور چناب کے ملحقہ علاقوں میں بھی پانی کی سطح بڑھنے کا امکان ہے۔
تازہ ترین خبروں کے لیے پی این آئی کا فیس بک پیج فالو کریں
