شدید بارشیں ، ہائی الرٹ جاری کر دیا گیا

محکمہ موسمیات کی جانب سے 23 سے 26 اگست کے دوران خیبرپختونخوا کے مختلف علاقوں میں وقفے وقفے سے بارشوں کی پیشگوئی کی گئی ہے، جس کے پیش نظر صوبائی ڈیزاسٹر مینجمنٹ اتھارٹی (پی ڈی ایم اے) نے تمام متعلقہ ضلعی انتظامیہ اور اداروں کو الرٹ رہنے کی ہدایت جاری کر دی ہے۔

پی ڈی ایم اے کے مطابق ایبٹ آباد، مانسہرہ، سوات، چترال، دیر، مالاکنڈ، کوہستان اور بونیر میں بارشوں کا نیا سلسلہ متوقع ہے، جبکہ پشاور، مردان، نوشہرہ، ڈی آئی خان اور وزیرستان سمیت دیگر اضلاع میں بھی بارش کے امکانات ہیں۔

بارشوں کے اس نئے سلسلے سے خیبرپختونخوا کے کئی علاقوں میں سیلابی صورتحال پیدا ہونے کا خدشہ ظاہر کیا گیا ہے۔ الرٹ میں خبردار کیا گیا ہے کہ مقامی ندی نالوں، دریاؤں اور برساتی نالوں میں طغیانی آسکتی ہے، جبکہ پہاڑی علاقوں میں لینڈ سلائیڈنگ اور شہری علاقوں میں اربن فلڈنگ کا خطرہ موجود ہے۔

دوسری جانب محکمہ موسمیات نے کراچی میں آئندہ تین گھنٹوں کے دوران آندھی اور تیز بارش کی پیشگوئی کی ہے۔ رپورٹ کے مطابق، موسلا دھار بارش کے دوران شہر کے نشیبی علاقے زیرِ آب آنے کا خدشہ ہے، جس پر متعلقہ اداروں کو ہائی الرٹ رہنے کی ہدایت جاری کی گئی ہے۔

بارش تیز ہواؤں اور آندھی کے ساتھ متوقع ہے، اور کچھ علاقوں میں پہلے ہی گرج چمک کے ساتھ بارش ہو چکی ہے۔ ایئرپورٹ، ملیر، گلشنِ حدید، نارتھ کراچی، سرجانی ٹاؤن اور ملحقہ علاقوں میں بارش جاری ہے، جبکہ صدر، اولڈ سٹی ایریا، سول اسپتال، ناظم آباد، سائٹ ایریا، منگھوپیر روڈ اور اطراف کے علاقوں میں بھی بارش ریکارڈ کی گئی ہے۔