نیشنل ڈیزاسٹر مینجمنٹ اتھارٹی (این ڈی ایم اے) نے سندھ کے مختلف اضلاع میں آئندہ 12 سے 24 گھنٹوں کے دوران شدید بارشوں اور ممکنہ سیلاب کے خدشے کے پیش نظر وارننگ جاری کر دی ہے۔
ترجمان این ڈی ایم اے کے مطابق متاثرہ اضلاع میں کراچی، ٹھٹھہ، سجاول، بدین، تھرپارکر، حیدرآباد، نوابشاہ، دادو، خیرپور، سکھر، گھوٹکی، لاڑکانہ، شکارپور، جیکب آباد اور کشمور شامل ہیں۔
بارشوں کا یہ سلسلہ آئندہ دو سے تین روز تک جاری رہنے کا امکان ہے، جو بعض علاقوں میں اچانک سیلاب (فلیش فلڈ) کا سبب بن سکتا ہے۔ کراچی، حیدرآباد اور دیگر ساحلی علاقوں میں اربن فلڈنگ کا خطرہ بھی ظاہر کیا گیا ہے۔
این ڈی ایم اے نے شہریوں کو ہدایت کی ہے کہ وہ نشیبی علاقوں سے گریز کریں، نکاسی آب کا خاص خیال رکھیں اور برقی تنصیبات سے دور رہیں۔
ترجمان نے مزید کہا ہے کہ صورتحال سے متعلق بروقت معلومات اور رہنمائی کے لیے شہری پاک این ڈی ایم اے ڈیزاسٹر الرٹ ایپ استعمال کریں۔
تازہ ترین خبروں کے لیے پی این آئی کا فیس بک پیج فالو کریں
