بارشوں اور برفباری کی پیشگوئی، الرٹ جاری

اسلا م آباد(پی این آئی) ملک کے بعض مقامات پر بارش اور پہاڑوں پر برفباری جبکہ کئی شہروں میں موسم خشک اور سرد رہنے کی پیشگوئی کی گئی ہے جبکہ محکمہ موسمیات کا کہنا ہے کہ کراچی میں دن کے اوقات میں موسم بدستور گرم رہے گا۔

تفصیلات کے مطابق محکمہ موسمیات کا کہنا ہےکہ آئندہ 24 گھنٹوں کے دوران شمالی بلوچستان، بالائی خیبر پختونخوا، گلگت بلتستان، کشمیر اور خطہ پوٹھو ہار میں تیز ہوائوں اور گرج چمک کے ساتھ بارش اور پہاڑوں پر برفباری کا امکان ہے۔اسلام آباد میں موسم سرد اور مطلع جزوی ابر آلود رہے گا جبکہ پنجاب کے بیشتر اضلاع میں موسم سرد اور خشک رہنے کا امکان ہے۔مری، گلیات میں رات کے اوقات میں ہلکی بارش ہو سکتی ہے، خیبرپختونخوا میں موسم سرد اور مطلع جزوی ابر آلود رہے گا جبکہ سندھ اور بلوچستان کے بیشتراضلاع میں موسم خشک رہنے کا امکان ہے۔پنجاب کے چند میدانی علاقوں اور بالائی سندھ میں اسموگ اور دھند چھائے رہنے کی توقع ہے۔

ملک کے مختلف علاقوں میں بارش نے موسم سرما کی آمد کا اعلان کردیا، بالائی علاقوں میں برفباری سے وادیوں کا حسن مزید نکھرگیا جبکہ یخ بستا ہواؤں نے ڈیرے جمانا شروع کردیے۔بلوچستان میں زیارت، پشین، ژوب، شیرانی، موسیٰ خیل، بارکھان اور خضدار میں بارش ہوئی، بلوچستان سے آنے والی ٹھنڈی ہواؤں نے سندھ کا موسم بھی تبدیل کردیا جبکہ جیکب آباد، قمرشہداد کوٹ میں بارش سےعوام کے چہرے کھل اٹھے۔پنجاب میں چنیوٹ، سیالکوٹ، علی پور اور ملحقہ علاقوں میں رم جھم نے موسم گرما کی چھٹی کردی، شدید برفباری کے باعث ناران میں سیاحتی سیزن اختتام پزیر ہوگیا جبکہ ضلعی انتظامیہ نے سیاحوں کے ناران سے آگے جانے پر پابندی لگادی۔