محکمہ موسمیات نے بارشوں سے متعلق ہلچل مچانے والی پیشنگوئی کر دی

اسلام آباد (پی این آئی) وفاقی دارالحکومت اور راولپنڈی میں ہونیوالی ہلکی بارش سے سردی کی شدت میں اضافہ ہوگیا ہے تاہم شہریوں کو خشک سردی سے نجات مل گئی ہے۔

محکمہ موسمیات کا کہنا ہے کہ آئندہ 24 گھنٹوں کے دوران سندھ کے کچھ اضلاع خاص کر کراچی میں ہلکی بارش کا امکان ہےجس سے وقتی طور پر سردی کی شدت میں اضافہ ہوگا تاہم اس کےبعد موسم بہتر ہوجائے گا، پنجاب کے چند میدانی علاقوں میں بھی ہلکی بارش ہوسکتی ہے۔ دوسری جانب ملک کے بالائی علاقوں میں بھی بارش اور برفباری کا سلسلہ جاری ہے ، وادی سوات کےسیاحتی مقام مالم جبہ اور کالام میں برفباری سے وادی کے حسن کو چار چاند لگ گئے، برفباری کا لطف اٹھانے کیلئے سیاح پہنچنا شروع ہوگئے ہیں۔سوات کے حسین سیاحتی مقام مالم جبہ میں طویل خشک سالی کے بعد برفباری کا آغاز ہوا۔برفباری سے مالم جبہ کی چوٹی نے سر پر برف کی سفید چادر اڑھ لی۔

مالم جبہ کے علاوہ وادی کالام میں بھی برفباری جاری ہے جس سے وادی کا حسن مزید نکھر گیا، ملک بھر سے سیاح پہنچ گئے۔ سیاحوں کا کہنا ہے کہ بڑا سفر کرکے یہاں کے خوبصورت نظارے دیکھنے پہنچیں ہیں۔خیبر پختون خوا کے پہاڑی علاقوں میں برفباری سے سردی کی شدت میں اضافہ ہوگیا۔ جب کہ پشاور سمیت مختلف شہروں میں بارش بھی ہوئی۔اس کے علاوہ سکردو میں موسم سرماکی پہلی برف باری ہوئی، جس کے بعد پہاڑوں نے سفید چادر اوڑھ لی، ہر سو برف کی چاندنی پھیلی ہوئی ہے۔