پاکستان نیوی کے کموڈور محمد یاسر نے کمبائنڈ ٹاسک فورس 150 کی کمان باضابطہ طور پر سنبھال لی۔ کمان کی تبدیلی کی تقریب بحرین میں کمبائنڈ میری ٹائم فورسز کے ہیڈکوارٹرز میں منعقد ہوئی۔
آئی ایس پی آر کے مطابق کموڈور محمد یاسر نے یہ ذمہ داری رائل سعودی نیول فورسز کے کموڈور فہد ایس الجواید سے وصول کی۔ کمبائنڈ ٹاسک فورس 150 کی قیادت سنبھالنا عالمی بحری سلامتی کے لیے پاکستان نیوی کے مؤثر اور متحرک کردار کی عکاسی کرتا ہے۔
کمانڈر سی ٹی ایف 150 کموڈور محمد یاسر نے اس موقع پر کہا کہ ان کی ٹیم اس اہم ذمہ داری کو انجام دینے کے لیے مکمل طور پر تیار ہے۔ انہوں نے خطے میں بحری سلامتی کے قیام کے لیے بھرپور عزم کا اظہار کرتے ہوئے غیر قانونی بحری سرگرمیوں کے خلاف مؤثر اقدامات جاری رکھنے کے عزم کی تجدید کی۔
کموڈور محمد یاسر کا کہنا تھا کہ ان کی قیادت میں ٹیم خطے میں بحری سلامتی اور استحکام کے فروغ کے لیے مؤثر کردار ادا کرے گی۔ انہوں نے اہم بحری مواصلاتی راستوں کے تحفظ اور ان کی سلامتی کو یقینی بنانے کے لیے پاکستان نیوی کے پختہ عزم کو بھی دہرایا۔
آئی ایس پی آر کے مطابق کمبائنڈ ٹاسک فورس 150 کمبائنڈ میری ٹائم فورسز کے تحت کام کرنے والی پانچ ٹاسک فورسز میں سے ایک ہے۔ اس فورس کا مشن بحر ہند، بحیرہ عرب اور خلیج عمان میں اسلحہ اور منشیات کی اسمگلنگ میں ملوث عناصر کی روک تھام اور ان کے نیٹ ورکس کو ناکام بنانا ہے۔
آئی ایس پی آر کا مزید کہنا ہے کہ رائل سعودی نیول فورسز کی کمان کے دوران کمبائنڈ ٹاسک فورس 150 کے تحت پاکستان نیوی کے جہازوں کی جانب سے کی جانے والی انسداد منشیات کارروائیاں پاکستان نیوی کے پختہ عزم کی عکاس ہیں۔ یہ کارروائیاں باہمی بحری تعاون کے ذریعے خطے میں امن و سلامتی کے قیام کے لیے پاکستان نیوی کی وابستگی کا عملی ثبوت ہیں۔
کمان کی تبدیلی کی اس تقریب میں بحرین میں پاکستان کے سفیر نے بھی شرکت کی۔ اس کے علاوہ کمانڈر کمبائنڈ میری ٹائم فورس، کمانڈر رائل بحرینی نیول فورسز اور کمبائنڈ میری ٹائم فورسز کے تحت کام کرنے والی مختلف بحری افواج کے نمائندے بھی موجود تھے۔
تازہ ترین خبروں کے لیے پی این آئی کا فیس بک پیج فالو کریں
