ترجمان دفتر خارجہ طاہر حسین اندرابی نے اس اہم پیش رفت سے آگاہ کیا ہے کہ پاکستان نے غزہ میں پائیدار امن کے قیام کے لیے تشکیل دیے گئے بورڈ آف پیس (BoP) میں شمولیت کی دعوت باقاعدہ طور پر قبول کر لی ہے۔ ترجمان کے مطابق، امریکی صدر ڈونلڈ جے ٹرمپ کی جانب سے وزیرِ اعظم محمد شہباز شریف کو اس بورڈ میں شمولیت کی دعوت دی گئی تھی، جس کے جواب میں پاکستان نے اقوامِ متحدہ کی سلامتی کونسل کی قرارداد 2803 کے تحت غزہ امن منصوبے پر عمل درآمد کی حمایت کا فیصلہ کیا ہے۔ پاکستان اس امید کا اظہار کرتا ہے کہ اس نئے فریم ورک کے قیام سے خطے میں مستقل جنگ بندی کے نفاذ کے لیے ٹھوس اقدامات کیے جا سکیں گے۔
طاہر حسین اندرابی نے مزید کہا کہ پاکستان کو توقع ہے کہ اس بورڈ آف پیس کے ذریعے فلسطینی عوام کے لیے انسانی امداد کی فراہمی میں نمایاں اضافہ ہوگا اور غزہ کی تعمیرِ نو کے لیے سنجیدہ کوششیں کی جائیں گی۔ پاکستان کی یہ بھی امید ہے کہ یہ تمام سفارتی کوششیں فلسطینی عوام کے حقِ خود ارادیت کے حصول میں مددگار ثابت ہوں گی تاکہ 1967 سے پہلے کی سرحدوں کے مطابق ایک ایسی آزاد اور خود مختار فلسطینی ریاست قائم ہو سکے جس کا دارالحکومت القدس الشریف ہو۔ پاکستان اس بورڈ کے رکن کی حیثیت سے اپنا بھرپور تعمیری کردار ادا کرنے کا عزم رکھتا ہے تاکہ فلسطینی بہن بھائیوں کی تکالیف کا خاتمہ ممکن ہو سکے۔
تازہ ترین خبروں کے لیے پی این آئی کا فیس بک پیج فالو کریں
