حکومت پاکستان اور جاپان کے درمیان جنوبی پنجاب میں بچوں کی صحت کی دیکھ بھال کے لیے گرانٹ معاہدے پر دستخط ہو گئے ہیں۔
جاپانی انٹرنیشنل کوآپریشن ایجنسی (جائیکا) اس منصوبے کے تحت تقریباً 2.91 ارب جاپانی ین (18.62 ملین ڈالر) کی گرانٹ فراہم کرے گی۔ اس رقم سے ملتان کے چلڈرن اسپتال اور انسٹی ٹیوٹ آف چائلڈ ہیلتھ کو طبی سہولیات کے لحاظ سے جدید بنایا جائے گا۔
یہ ادارہ خطے کا سب سے بڑا چائلڈ ٹرشری کیئر اسپتال ہے، جہاں مریضوں کی دیکھ بھال کو مزید مؤثر بنانے پر توجہ دی جائے گی۔
ایکسچینج آف نوٹس کی تقریب میں پاکستان کی طرف سے سیکرٹری اقتصادی امور محمد حمیر کریم نے دستخط کیے، جبکہ جاپان کی نمائندگی پاکستان میں تعینات سفیر اکا ماتسو شوئچی نے کی۔
سیکرٹری اقتصادی امور نے جاپانی حکومت اور عوام کی معاونت کو سراہتے ہوئے کہا کہ منصوبے کے کامیاب نفاذ کے لیے ہر ممکن سہولت فراہم کی جائے گی، اور دونوں ممالک کے درمیان تعاون کو مزید فروغ دیا جائے گا۔
جاپانی سفیر نے اس موقع پر اپنے عزم کا اظہار کیا کہ وہ پاکستان کے ساتھ قریبی تعاون جاری رکھیں گے اور دوطرفہ تعلقات کو مضبوط بنانے کی کوشش کریں گے۔
تازہ ترین خبروں کے لیے پی این آئی کا فیس بک پیج فالو کریں
