**بھارت نے سندھ طاس معاہدے کی خلاف ورزی کرتے ہوئے مقبوضہ کشمیر میں دریائے چناب پر پن بجلی منصوبے کی منظوری دی**
بھارت نے مقبوضہ جموں و کشمیر میں دریائے چناب پر دلہستی سٹیج ٹو پن بجلی منصوبے کی حتمی منظوری دے دی ہے، جس پر پاکستان نے سندھ طاس معاہدے کی خلاف ورزی کا تحفظ ظاہر کیا ہے۔ نجی ٹی وی چینل دنیا نیوز کے مطابق، یہ منصوبہ 260 میگاواٹ تک بجلی پیدا کرے گا اور اس پر 3,277 کروڑ 45 لاکھ بھارتی روپے لاگت آئے گی۔
منصوبے کو بھارت کی سرکاری کمپنی این ایچ پی سی لمیٹڈ تیار کرے گی اور عملی کام آئندہ سال کے آغاز میں شروع ہونے کا امکان ہے۔ دلہستی سٹیج ٹو میں دلہستی سٹیج ون کے موجودہ ڈھانچے کو استعمال کیا جائے گا، جو 2007 میں مکمل ہوا تھا۔
ماہرین کا کہنا ہے کہ یہ منصوبہ پاکستان کے لیے دفاعی اور تزویراتی لحاظ سے نقصان دہ ہو سکتا ہے، کیونکہ دریائے چناب پاکستان کے حصے میں آنے والے دریاؤں میں شامل ہے۔ ان کا کہنا ہے کہ اس منصوبے کی تعمیر سندھ طاس معاہدے کی روح کے منافی ہے۔
یہ اقدام ایسے وقت میں آیا ہے جب بھارت نے حال ہی میں سندھ طاس معاہدے کو یکطرفہ طور پر معطل کرنے کا اعلان کیا تھا۔ پاکستان نے بھارت کی اس کارروائی پر شدید تحفظات کا اظہار کیا ہے اور بین الاقوامی برادری کی توجہ اس مسئلے کی طرف مبذول کرائی ہے۔
تازہ ترین خبروں کے لیے پی این آئی کا فیس بک پیج فالو کریں
