**پاکستان نے اسرائیل کے صومالی لینڈ کو تسلیم کرنے کے اعلان کو مسترد کر دیا**
پاکستان کی وزارت خارجہ نے اسرائیل کے صومالی لینڈ کو آزاد ریاست کے طور پر تسلیم کرنے کے اعلان کو مسترد کرتے ہوئے اس اقدام کو غیر قانونی اور اشتعال انگیز قرار دیا ہے۔
وزارت خارجہ کے ترجمان طاہر حسین اندرابی نے اپنے بیان میں کہا کہ یہ اقدام صومالیہ کی خودمختاری، اتحاد اور علاقائی سالمیت کو نقصان پہنچانے کی کوشش ہے۔ انہوں نے زور دیتے ہوئے کہا کہ ایسی کارروائیاں بین الاقوامی قانون کی کھلی خلاف ورزی ہیں اور نہ صرف صومالیہ بلکہ پورے خطے کے امن و استحکام کو خطرے میں ڈال سکتی ہیں۔
ترجمان نے عالمی برادری سے مطالبہ کیا کہ وہ اس اقدام کو مسترد کرے اور اسرائیل کو خطے میں امن کی کوششوں کو نقصان پہنچانے سے روکے۔ انہوں نے کہا کہ پاکستان صومالیہ کی خودمختاری اور استحکام کی تمام کوششوں کی مکمل حمایت کرتا ہے۔
اندرابی نے اس موقع پر فلسطینی عوام کے حق خودارادیت کی حمایت کا اعادہ کرتے ہوئے کہا کہ پاکستان آزاد، خودمختار فلسطینی ریاست کے قیام کی بلاشرط حمایت کرتا ہے، جس کا دارالحکومت القدس الشریف ہو اور جو 1967 کی سرحدوں پر قائم ہو۔
دوسری جانب سعودی عرب نے بھی صومالیہ کی خودمختاری کی حمایت کرتے ہوئے اسرائیل کے اعلان کو مسترد کیا ہے، جبکہ امریکی صدر ڈونلڈ ٹرمپ نے بھی صومالی لینڈ کو تسلیم کرنے کی تجویز کی حمایت سے انکار کر دیا ہے۔
واضح رہے کہ اسرائیل پہلا ملک ہے جس نے صومالی لینڈ کو آزاد ریاست کے طور پر تسلیم کیا ہے، جبکہ بین الاقوامی برادری اب تک صومالیہ کو ایک متحد ریاست کے طور پر ہی تسلیم کرتی ہے۔
تازہ ترین خبروں کے لیے پی این آئی کا فیس بک پیج فالو کریں
