احتساب عدالت نے توشہ خانہ ٹو کیس میں بانی پی ٹی آئی عمران خان اور ان کی اہلیہ بشریٰ بی بی کو مجموعی طور پر 17، 17 سال قید اور فی کس 1 کروڑ 64 لاکھ روپے سے زائد جرمانہ کی سزا سنا دی ہے۔ جرمانہ ادا نہ کرنے کی صورت میں دونوں کو مزید 6، 6 ماہ قید بھگتنا ہوگی۔
احتساب عدالت کے اسپیشل جج سینٹرل شاہ رخ ارجمند نے اڈیالہ جیل میں فیصلہ سناتے ہوئے بتایا کہ پاکستان پینل کوڈ کی دفعہ 409 کے تحت دونوں کو 7، 7 سال جبکہ انسدادِ رشوت ستانی ایکٹ کے تحت 10، 10 سال قید کی سزا دی گئی۔ یوں مجموعی سزا 17 سال بنتی ہے۔
تحریری فیصلے کے مطابق استغاثہ اپنا مقدمہ ثابت کرنے میں کامیاب رہا اور عدالت نے دونوں ملزمان کو خیانتِ مجرمانہ کا مرتکب قرار دیا۔ فیصلے میں یہ بھی واضح کیا گیا کہ بانی پی ٹی آئی کی عمر اور بشریٰ بی بی کے خاتون ہونے کو مدِنظر رکھتے ہوئے کم سے کم سزا دی گئی، جبکہ حوالات میں گزارا گیا عرصہ بھی سزا میں شامل کیا گیا ہے۔
الزامات کیا تھے؟
استغاثہ کے مطابق 2021 میں سعودی ولی عہد کی جانب سے موصول ہونے والا بلغاری جیولری سیٹ—جس میں نیکلس، بریسلیٹ، انگوٹھی اور ائیررِنگز شامل تھیں—کی اصل مالیت ساڑھے 7 کروڑ روپے سے زائد تھی۔ تاہم ملزمان نے ایک نجی فرم کے ذریعے اس کی قیمت صرف 59 لاکھ روپے لگوائی۔
ریکارڈ کے مطابق یہ تحفہ توشہ خانہ میں جمع نہیں کروایا گیا اور کم قیمت لگوانے کے لیے اثر و رسوخ استعمال کیا گیا۔ وزارتِ خارجہ اور ایف آئی اے کے ریکارڈ سے بھی جیولری سیٹ کی تفصیلات حاصل کی گئیں۔
کیس کا پس منظر
13 جولائی 2024 کو نیب نے دونوں ملزمان کو اڈیالہ جیل میں گرفتار کیا۔ تفتیش مکمل ہونے کے بعد 20 اگست کو ریفرنس دائر ہوا اور 16 ستمبر 2024 سے ٹرائل کا آغاز ہوا۔
اکتوبر 2024 میں اسلام آباد ہائیکورٹ نے پہلے بشریٰ بی بی اور پھر نومبر میں بانی پی ٹی آئی کی ضمانت منظور کی۔ 12 دسمبر 2024 کو فردِ جرم عائد کی گئی اور تقریباً ایک سال جاری رہنے والے ٹرائل کے دوران 80 سے زائد سماعتیں ہوئیں۔
گواہان اور وکلا
کیس میں کُل 21 گواہان شامل تھے، جن میں سابق ملٹری سیکریٹری بریگیڈیئر (ر) محمد احمد، نجی اپریزر صہیب عباسی اور سابق پرنسپل سیکریٹری انعام اللہ اہم گواہان تھے۔
سرکار کی جانب سے وفاقی پراسیکیوٹر ذوالفقار عباس نقوی سمیت ٹیم نے پیروی کی، جبکہ دفاع کی نمائندگی ارشد تبریز، قوثین فیصل مفتی اور بیرسٹر سلمان صفدر نے کی۔
تازہ ترین خبروں کے لیے پی این آئی کا فیس بک پیج فالو کریں
