کاؤنٹر ٹیررازم ڈیپارٹمنٹ (سی ٹی ڈی) پنجاب نے لاہور، فیصل آباد اور بہاولپور میں مختلف کارروائیاں کرتے ہوئے بھارتی خفیہ ایجنسی ’را‘ سے مبینہ تعلق رکھنے والے 12 دہشت گردوں کو گرفتار کرنے کا دعویٰ کیا ہے۔
سی ٹی ڈی ترجمان کے مطابق ملزمان کے قبضے سے حساس تنصیبات کی تصاویر، ویڈیوز، اسلحہ اور بارودی مواد بھی برآمد ہوا ہے۔ ملزمان سے ایک مدرسے اور ایک میلے کی لوکیشنز، تصاویر اور ویڈیوز بھی حاصل کی گئی ہیں۔ ترجمان نے بتایا کہ لاہور سے گرفتار افراد میں سکھ دیپ سنگھ، عظمت، فیضان، نبیل، ابرار، عثمان اور سرفراز شامل ہیں جبکہ فیصل آباد سے دانش کو حراست میں لیا گیا۔ بہاولپور میں ہونے والی کارروائی کے دوران ’’فتنہ الہندوستان‘‘ نامی گروہ سے تعلق رکھنے والے رجب، ہاشم، ثاقب اور عارف کو گرفتار کیا گیا۔
ترجمان کے مطابق ان دہشت گردوں کی گرفتاری بھارت سے آپریٹ ہونے والی ’عادل‘ نامی فیس بک آئی ڈی کے ذریعے ممکن ہوئی۔ مزید بتایا گیا کہ سکھ دیپ سنگھ پیدائشی طور پر کرسچن تھا اور کچھ عرصہ قبل اُس نے اپنا مذہب تبدیل کیا تھا، جبکہ تمام ملزمان کو ’را‘ کی جانب سے بھاری فنڈنگ بھی ملتی رہی۔ سی ٹی ڈی کے مطابق گرفتار افراد کے خلاف مقدمات درج کر کے مزید تفتیش شروع کر دی گئی ہے۔
تازہ ترین خبروں کے لیے پی این آئی کا فیس بک پیج فالو کریں
