خیبرپختونخوا حکومت نے 9 مئی کے مزید مقدمات ختم کرنے کا فیصلہ کیا ہے۔
محکمہ قانون خیبرپختونخوا نے 57 کیسز ختم کرنے کی سفارشات صوبائی کابینہ کو ارسال کر دی ہیں۔ ذرائع کے مطابق متعدد مقدمات میں پی ٹی آئی کے اراکین اسمبلی نامزد ہیں اور سزا کی صورت میں نااہلی کا خطرہ موجود ہے۔ صوبے میں اب تک 9 مئی کے درجنوں کیسز نمٹا دیے گئے ہیں۔
ایڈووکیٹ جنرل آفس کی جانب سے مقدمات واپس لینے کی باضابطہ سفارش تیار کر لی گئی ہے۔ حکومتی ذرائع کے مطابق حتمی فیصلہ صوبائی کابینہ اجلاس میں کیا جائے گا اور کابینہ کی منظوری کے بعد عدالتوں میں مقدمات واپس لینے کی کارروائی شروع ہو گی، جس کے بعد ریاست دعویداری سے دستبردار ہو جائے گی۔
حکومتی معاون خصوصی شفیع اللہ جان نے بتایا کہ علی امین گنڈا پور کی حکومت میں بھی کابینہ سے سرکولیشن کے ذریعے مقدمات سے دستبرداری کی منظوری لی گئی تھی اور موجودہ کیسز سیاسی اور انتقامی بنیادوں پر بنائے گئے تھے، جو انصاف کے تقاضوں پر پورے نہیں اُترتے، اس لیے ایسے بے بنیاد مقدمات ختم کیے جائیں گے۔
تازہ ترین خبروں کے لیے پی این آئی کا فیس بک پیج فالو کریں
