ترجمان دفتر خارجہ نے کہا ہے کہ پاکستان قابض اسرائیلی فورسز کی جانب سے غزہ میں معصوم فلسطینیوں پر حملوں کی شدید مزمت کرتا ہے۔
ترجمان دفتر خارجہ طاہر حسین اندرابی کے مطابق ان حملوں میں معصوم بچے اور خواتین جاں بحق اور زخمی ہوئے ہیں۔ انہوں نے کہا کہ اسرائیل ان حملوں کے ذریعے بین الاقوامی قوانین اور حالیہ امن معاہدے کی سنگین خلاف ورزی کر رہا ہے۔
ترجمان کے مطابق یہ حملے امن کے لیے جاری کوششوں کو بھی سبوتاژ کر رہے ہیں اور یہ شرم الشیخ میں طے پانے والے امن معاہدے کی کھلی خلاف ورزی ہیں۔
ترجمان دفتر خارجہ طاہر حسین اندرابی کا کہنا ہے کہ حکومت پاکستان عالمی برادری سے اسرائیلی استثنیٰ اور جنگ بندی کی خلاف ورزیوں کو ختم کرنے کا مطالبہ کرتی ہے۔ انہوں نے کہا کہ بین الاقوامی انسانی حقوق اور انسانی قانون کی پاسداری کے لیے فوری اقدامات کیے جانے چاہئیں۔
ترجمان دفتر خارجہ کا مزید کہنا ہے کہ پاکستان آزاد سرحدوں پر مبنی ایک آزاد، خودمختار اور ملحقہ ریاست فلسطین کے قیام کے حق میں اپنے اصولی موقف کا اعادہ کرتا ہے۔
تازہ ترین خبروں کے لیے پی این آئی کا فیس بک پیج فالو کریں
