دھماکا، ہلاکتیں ہو گئیں

فیصل آباد کے علاقے ملک پور میں کیمیکل فیکٹری میں گیس لیکج کے باعث خوفناک دھماکے میں ہلاکتوں کی تعداد 15 ہوگئی ہے۔

جیونیوز کے مطابق دھماکا اتنا شدید تھا کہ پوری فیکٹری زمین بوس ہوگئی اور اس میں آگ بھڑک اُٹھی، جبکہ قریب موجود گھروں کی چھتیں بھی گر گئیں۔ ریسکیو حکام نے بتایا کہ اطلاع ملتے ہی امدادی کارروائیاں شروع کردی گئیں، ملبے سے 14 افراد کی لاشیں نکالی جاچکی ہیں جبکہ ایک شدید زخمی اسپتال میں دم توڑ گیا۔ ریسکیو اہلکاروں کا کہنا ہے کہ 7 زخمیوں کو فوری طور پر اسپتال منتقل کیا گیا جہاں انہیں طبی امداد فراہم کی جا رہی ہے۔ جائے وقوعہ پر ملبہ ہٹانے کا کام جاری ہے اور شبہ ہے کہ مزید افراد ملبے تلے دبے ہوسکتے ہیں۔

کمشنر فیصل آباد نے بتایا کہ ابتدائی تحقیقات کے مطابق دھماکا گیس پائپ لائن پھٹنے کے نتیجے میں ہوا۔ ملک پور میں چار فیکٹریاں ایک ساتھ منسلک ہو کر کام کر رہی تھیں، جس کے باعث سب سے زیادہ جانی نقصان فیکٹری کے ساتھ جڑے گھروں کے رہائشیوں کا ہوا۔ واقعے کی تحقیقات کے لیے 5 رکنی کمیٹی تشکیل دے دی گئی ہے۔