سپریم کورٹ نے اپنے رولز میں ترمیم کر لی

سپریم کورٹ نے اپنے رولز میں اہم ترمیمات کی منظوری دے دی ہے۔ چیف جسٹس پاکستان جسٹس یحییٰ آفریدی کی زیر صدارت فل کورٹ کا اجلاس دوپہر کے وقت منعقد ہوا، جس میں سپریم کورٹ رولز 2025 میں تبدیلیوں کو متفقہ طور پر منظور کیا گیا۔

ترمیمات ان سفارشات کی بنیاد پر کی گئیں جو اس مقصد کے لیے قائم کردہ کمیٹی نے پیش کی تھیں۔ یہ کمیٹی سپریم کورٹ رولز 2025 کے آرڈر I کے رول 1(4) کے تحت تشکیل دی گئی تھی تاکہ رولز پر عملدرآمد کے دوران سامنے آنے والی مشکلات کا جائزہ لے کر ان کے حل کے لیے تجاویز مرتب کرے۔

اجلاس کے بعد جاری اعلامیہ کے مطابق کمیٹی میں جسٹس شاہد وحید، جسٹس عرفان سعادت خان، جسٹس نعیم اختر افغان اور جسٹس عقیل احمد عباسی شامل تھے۔ کمیٹی نے سپریم کورٹ رولز 1980 کا تفصیلی جائزہ لیا، رولز 2025 کا مسودہ تیار کیا اور قوانین میں موجود پیچیدگیوں کو دور کرنے سے متعلق اپنی سفارشات پیش کیں۔ فل کورٹ نے کمیٹی کے ہر رکن کی انفرادی محنت کو سراہتے ہوئے اسے قابلِ تحسین قرار دیا۔

اعلامیہ کے مطابق نئے رولز کا مقصد عدالتی نظام کو بہتر بنانا، سروس ڈلیوری کو مؤثر کرنا اور عوام کو تیز اور معیاری انصاف فراہم کرنا ہے۔

فل کورٹ نے اجلاس کے دوران ایڈووکیٹ محمد منیر پراچہ کو سپریم کورٹ رولز 2025 کے آرڈر IV کے رول 5 کے تحت سینئر ایڈووکیٹ سپریم کورٹ آف پاکستان کا درجہ دینے کی منظوری بھی دی۔

فل کورٹ نے اعلان کیا کہ سپریم کورٹ رولز 2025 کو باضابطہ طور پر اپ ڈیٹ کر دیا گیا ہے۔