کراچی: وفاقی وزیر خزانہ محمد اورنگزیب نے انکشاف کیا ہے کہ حکومت نے 24 سرکاری اداروں کی نجکاری کا فیصلہ کرلیا ہے، جبکہ پی آئی اے کی نجکاری رواں سال کے اختتام سے قبل مکمل کرلی جائے گی۔
فیوچر سمٹ سے خطاب میں وزیر خزانہ نے کہا کہ پاکستان کی معیشت درست سمت میں بڑھ رہی ہے اور پائیدار ترقی کے لیے نجی شعبے کا کردار نہایت اہم ہے۔ ان کے مطابق پیداوار پر مبنی معیشت ہی دیرپا ترقی کی ضمانت ہے، جسے عالمی سطح پر بھی سراہا جا رہا ہے۔ محمد اورنگزیب نے بتایا کہ عالمی ریٹنگ ایجنسیوں نے پاکستان کی معاشی بہتری کا اعتراف کیا ہے، جب کہ دنیا بھر میں معاشی اصلاحات کا عمل تیز ہو رہا ہے۔ انہوں نے کہا کہ پاکستان میں کارپوریٹ منافع میں 9 فیصد اضافہ ہوا ہے، جو معیشت کی بحالی کا ثبوت ہے۔
وفاقی وزیر کے مطابق حکومت عالمی سفارتی کامیابیوں سے فائدہ اٹھانے کے لیے مضبوط معاشی ایکو سسٹم قائم کر رہی ہے۔ انہوں نے بتایا کہ گوگل پاکستان کو ایکسپورٹ حب بنانے کا منصوبہ رکھتا ہے، جب کہ حکومت آئی ٹی اور میری ٹائم سیکٹر کو فروغ دینے پر توجہ دے رہی ہے تاکہ پائیدار ترقی کے مواقع بڑھائے جا سکیں۔ وزیر خزانہ نے کہا کہ قومی آمدن بڑھانے کے لیے ٹیکس نیٹ میں 9 لاکھ نئے فائلرز شامل کیے گئے ہیں، اور مصر نے ایف بی آر اصلاحات سے سیکھنے کی درخواست بھی کی ہے۔ ان کے مطابق ڈیجیٹلائزیشن معیشت میں شفافیت لائے گی، جب کہ اے آئی پر مبنی ترقی کے لیے ایک مربوط نظام تشکیل دیا جا رہا ہے۔
انہوں نے مزید کہا کہ پاکستان کو برآمدات کا مرکز بنانا حکومت کی اولین ترجیح ہے، اور بلیو اکانومی کے فروغ کے وسیع مواقع موجود ہیں۔
تازہ ترین خبروں کے لیے پی این آئی کا فیس بک پیج فالو کریں
