نیشنل ڈیزاسٹر مینجمنٹ اتھارٹی (این ڈی ایم اے) نے خبردار کیا ہے کہ آئندہ 24 گھنٹوں کے دوران کراچی، حیدرآباد، ٹھٹھہ اور بدین میں موسلادھار بارش کا امکان ہے۔ اسی طرح میرپورخاص، سکھر اور قریبی علاقوں میں بھی 50 سے 100 ملی میٹر سے زائد بارش متوقع ہے۔
این ڈی ایم اے کے مطابق کراچی، حیدرآباد، سکھر اور میرپورخاص میں اربن فلڈنگ جبکہ ٹھٹھہ، بدین، جامشورو اور دادو میں سیلاب کا خطرہ ہے۔ شدید بارش کے باعث مرکزی شاہراہیں اور مقامی سڑکیں زیرِ آب آسکتی ہیں، جس سے آمدورفت متاثر ہونے اور بجلی و ٹیلی کمیونیکیشن سروسز میں تعطل کا خدشہ ہے۔ محکمۂ موسمیات نے کراچی میں گزشتہ روز ہونے والی بارش کے اعداد و شمار بھی جاری کیے۔ سب سے زیادہ 178 ملی میٹر بارش گلشن حدید میں ریکارڈ کی گئی۔ یونیورسٹی روڈ پر 145، شارع فیصل پر 133، گلشن معمار میں 102، ناظم آباد میں 149 اور پرانے ایئرپورٹ پر 163 ملی میٹر بارش ریکارڈ ہوئی۔
اسی طرح نارتھ کراچی میں 148، کورنگی میں 138، اورنگی ٹاؤن میں 81، سعدی ٹاؤن میں 146، ڈی ایچ اے فیز 7 میں 138، کیماڑی میں 173، جناح ٹرمینل پر 156، سرجانی ٹاؤن میں 151 اور پی اے ایف بیس مسرور پر 101 ملی میٹر بارش ریکارڈ ہوئی۔ بحریہ ٹاؤن میں سب سے کم 4.8 ملی میٹر بارش ہوئی۔
تازہ ترین خبروں کے لیے پی این آئی کا فیس بک پیج فالو کریں
