وزیر دفاع خواجہ آصف نے بھارتی ایئر چیف کے حالیہ دعوؤں کو غیر معقول اور غیر موزوں قرار دیتے ہوئے دونوں ممالک کے جنگی طیاروں کے موجودہ ذخیرے کی آزادانہ اور غیر جانبدارانہ تصدیق کا چیلنج دے دیا۔
اپنے بیان میں خواجہ آصف نے واضح کیا کہ بھارت نہ کوئی پاکستانی طیارہ مار گرا سکا اور نہ تباہ کر سکا، جبکہ پاکستان نے چھ بھارتی جنگی طیارے اور ایس-400 فضائی دفاعی نظام کو تباہ کیا۔ انہوں نے کہا کہ پاکستان نے فوری طور پر بین الاقوامی میڈیا کو تکنیکی بریفنگ فراہم کی، جس کی غیر جانبدار مبصرین نے تصدیق کی اور متعدد بھارتی طیاروں، بشمول رافیل، کے نقصان کا اعتراف کیا۔
وزیر دفاع کے مطابق عالمی رہنماؤں، بھارتی سیاست دانوں اور غیر ملکی انٹیلی جنس رپورٹس میں بھی ان نقصانات کا ذکر موجود ہے۔ انہوں نے مزید کہا کہ بھارتی ایئر فورس کے سربراہ کے تاخیری دعوے نہ صرف بے بنیاد ہیں بلکہ تین ماہ بعد سامنے آنے سے ان کی ساکھ مزید مشکوک ہو گئی ہے۔
تازہ ترین خبروں کے لیے پی این آئی کا فیس بک پیج فالو کریں
