بانیٔ پی ٹی آئی کی علی امین گنڈاپور اور علیمہ خان پر تنقید

راولپنڈی: ذرائع کے مطابق اڈیالہ جیل میں بانیٔ پاکستان تحریک انصاف (پی ٹی آئی) کی سہولیات بحال کر دی گئی ہیں۔ انہیں دوبارہ کتابیں، اخبار اور دیگر سہولیات فراہم کر دی گئی ہیں۔

ذرائع نے بتایا کہ گزشتہ روز بانیٔ پی ٹی آئی کو ان کے بچوں سے ایک گھنٹہ فون پر بات کروائی گئی۔ اس دوران انہوں نے بتایا کہ بچوں کا نائیکوپ (NICOP) ایکسپائر ہو چکا ہے۔ ان کا کہنا تھا کہ اگر بچے ملاقات کے لیے آنا چاہیں تو ضرور آئیں، لیکن انہوں نے کبھی یہ نہیں کہا کہ بچے احتجاجی تحریک کے لیے پاکستان آئیں۔ ذرائع کے مطابق بانیٔ پی ٹی آئی نے علیمہ خان کے سیاسی بیانات پر ناراضی کا اظہار کرتے ہوئے کہا کہ علیمہ خان کو سیاسی معاملات میں مداخلت نہیں کرنی چاہیے۔

انہوں نے مشال یوسفزئی کے سینیٹر بننے سے متعلق علیمہ خان کے بیان کو غیر ضروری قرار دیا۔ علاوہ ازیں، بانیٔ پی ٹی آئی نے خیبرپختونخوا کے وزیراعلیٰ علی امین گنڈاپور کی کارکردگی پر بھی سوالات اٹھائے۔ ان کا کہنا تھا کہ اگر علی امین صوبے میں امن و امان قائم نہیں کر سکتے تو استعفیٰ دے دینا چاہیے۔ ان کے مطابق اگر گورننس کے مسائل حل نہیں ہو رہے تو کسی اور کو موقع ملنا چاہیے۔