اسلام آباد: شناختی کارڈ سے متعلق قوانین میں 23 سال بعد بڑی تبدیلیاں متعارف کرائی گئی ہیں، جو شہریوں کے لیے نہایت اہم خبر ہے۔
تفصیلات کے مطابق نیشنل ڈیٹا بیس اینڈ رجسٹریشن اتھارٹی (نادرا) نے طویل عرصے بعد شناختی کارڈ کے ضوابط میں اہم اصلاحات کرتے ہوئے متعدد آن لائن سہولیات متعارف کرا دی ہیں۔ اب شہری موبائل ایپ یا نادرا کے ویب پورٹل کے ذریعے شناختی کارڈ سے متعلق کئی خدمات گھر بیٹھے حاصل کر سکیں گے، جن میں نیا شناختی کارڈ بنوانا، تجدید اور دیگر متعلقہ امور شامل ہیں۔
نادرا کے ایک سینئر افسر کا کہنا ہے کہ نئی پالیسی کے تحت بائیومیٹرک تصدیق کے نظام کو جدید تقاضوں کے مطابق اپ گریڈ کیا گیا ہے، جس سے ڈیٹا کے تحفظ کو مزید مؤثر بنایا گیا ہے اور نظام میں شفافیت بڑھے گی۔
اس کے علاوہ، بچوں کی پیدائش کے اندراج کے لیے یونین کونسل میں رجسٹریشن کو لازمی قرار دیا گیا ہے تاکہ جعلی اندراجات کا خاتمہ ممکن بنایا جا سکے۔
یہ تمام اصلاحات حال ہی میں وفاقی کابینہ سے منظوری کے بعد نافذ کی گئی ہیں، جن کا مقصد ملک کے شناختی نظام کو عالمی معیار کے مطابق ہم آہنگ کرنا ہے۔
تازہ ترین خبروں کے لیے پی این آئی کا فیس بک پیج فالو کریں
