اسلام آباد (پی این آئی) نئی حکومتی پالیسی کے مطابق 100 سے زائد افراد کے نام ایگزٹ کنٹرول لسٹ (ای سی ایل) سے نکال دیے گئے۔نجی ٹی وی کے مطابق جن افراد کے نام ای سی ایل سے نکالے گئے ہیں ان کے نام اس لسٹ پر ڈالنے کی تجویز قومی احتساب بیورو (نیب) اور وفاقی تحقیقاتی ادارے (ایف آئی اے) کی جانب سے دی گئی تھی۔
ذرائع کا کہنا ہے کہ جن افراد کے نام حساس ادارے اور عدالت کی جانب سے ای سی ایل پر ڈالنے کا کہا گیا ہے ان ناموں کو لسٹ پر برقرار رکھا جائے گا۔جن افراد کے نام ای سی ایل سے نکالے گئے ہیں ان میں سابق وزیر اعظم نواز شریف، مسلم لیگ ن کی نائب صدر مریم نواز، موجودہ وزیر اعظم شہباز شریف اور منتخب وزیر اعلیٰ پنجاب حمزہ شہباز بھی شامل ہیں۔ اس کے علاوہ سابق صدر آصف علی زرداری اور ان کی بہن فریال تالپور سمیت دیگر نام بھی لسٹ سے نکالے گئے ہیں۔ سابق وزیر اعظم شاہد خاقان عباسی، موجودہ وفاقی وزیر داخلہ رانا ثناء اللہ، وزیر ریلوے خواجہ سعد رفیق، وزیر دفاع خواجہ آصف اور وزیر ترقی و منصوبہ بندی احسن اقبال کے نام بھی ای سی ایل سےنکال دیئے گئے ہیں۔
نجی ٹی وی کے مطابق موجودہ اتحادی حکومت نے ای سی ایل کے حوالے سے نئی پالیسی وضع کی ہے جس کے تحت چار ماہ تک ای سی ایل پر رہنے والے نام لسٹ سے نکال دیے جائیں گے۔ ذرائع کا کہنا ہے کہ ابتدائی طور پر اہم شخصیات کے نام ہی لسٹ سے خارج کیے گئے ہیں تاہم مجموعی طور پر تین ہزار کے قریب نام ای سی ایل سے نکالے جائیں گے۔ اس حوالے سے وزارت داخلہ میں لسٹوں کی چھانٹی جاری ہے۔
تازہ ترین خبروں کے لیے پی این آئی کا فیس بک پیج فالو کریں
