پاکستان آنے والوں کے لیے بری خبر، سفر سے پہلے کورونا ٹیسٹ کی مدت کم کر دی گئی، ہوٹل میں قرنطینہ بھی اپنے خرچ پر

کراچی (پی این آئی) بیرون ملک سے وطن واپس آنے والے پاکستانیوں کے لیے بڑی اور بری خبر یہ ہے کہ سول ایوی ایشن اتھارٹی نے بیرون ملک سے پاکستان آنے والی پروازوں سے متعلق نیا حکم نامہ جاری کردیا ہے جس پر 5 جنوری سےعمل درآمد ہوگا۔ کورونا کی وباء کے حوالے سے احتیاطی تدابیر اختیار کرتے ہوئے سی اے اے نے ممانعت والے ملکوں کی کیٹیگری بی اور کیٹیگری سی فہرست کو ختم کرنے کا فیصلہ کیا ہے لیکن نئی پالیسی کے تحت بیرون ملک سے آنے والے مسافروں کے لئے پرواز سے 48 گھنٹے قبل پی سی آر ٹیسٹ لازمی قرار دیا گیا ہے۔

نئے حکم نامے کے مطابق یورپی ملکوں سے پاکستان پہنچنے والے مسافروں کے لئے ریپڈ انٹیجن ٹیسٹ لازمی قرار دیا گیا ہے۔ کورونا ٹیسٹ مثبت آنے پر مسافروں کو 10 روز کے لیے قرنطینہ سینٹرز میں رکھا جائے گا۔ حکم نامے میں اس سے متعلق کہا گیا ہے کہ ہوٹل یا مخصوص جگہ پر قرنطینہ مسافر اپنے اخراجات اٹھانے کے پابند ہوں گے۔ واضح رہے کہ گزشتہ سال 14 دسمبر کو پاکستان سول ایوی ایشن اتھارٹی کی جانب سے بیرونِ ملک سے آنے والے مسافروں کے لیے کورونا ویکسی نیشن کی مکمل ڈوز کے بغیر پاکستان سفر کی سہولت کے اجازت نامے میں 2 ماہ کی توسیع کی گئی تھی۔۔۔۔۔