اسلام آباد (اے پی پی)وزیراعظم عمران خان کو یورپی کونسل کے صدر چارلس میچل نے ٹیلی فون کیا اور ان سے افغانستان کی صورتحال پر تبادلہ خیال کیا۔ وزیراعظم نے افغانستان سے سفارتی و بین الاقوامی اداروں کے عملے اور دیگر افراد کے انخلا میں سہولت فراہم کرنے میں پاکستان کے مثبت کردار کو اجاگر کیا۔ یورپی کونسل کے صدر نے انخلاءکے لئے راہداری کی فراہمی اور میزبانی پر وزیر اعظم کا شکریہ ادا کیا۔ وزیراعظم نے پاکستان کے نقطہ نظر کی وضاحت کرتے ہوئے اس بات پر زور دیا کہ ایک مستحکم اور پرامن افغانستان پاکستان اور خطے کے مفاد میں ہے۔ وزیر اعظم نے اس بات پر زور دیا کہ افغانستان کے تمام لوگوں کے حقوق کے تحفظ کے ساتھ ساتھ ان کی حفاظت اور سلامتی کو یقینی بنانے کی ضرورت ہے۔ انہوں نے کہا کہ ایک جامع سیاسی تصفیہ ہی آگے بڑھنے کا بہترین راستہ ہے۔ وزیراعظم عمران خان نے اس امید کا اظہار کیا کہ افغان رہنما اس مقصد کے حصول کے لیے مل کر کام کرتے رہیں گے۔ وزیراعظم نے پاکستان کے اس عزم کا اعادہ کیا کہ وہ مسئلہ کے حل کے لئے اپنی کوششیں جاری رکھے گا۔ انہوں نے کہا کہ افغانستان میں سلامتی کی صورتحال کو مستحکم کرنا امن کو برقرار رکھنے، انسانی ہمدردی کے کسی بھی چیلنج سے نمٹنے اور افغان عوام کے معاشی بہبود کو یقینی بنانے کے لیے ضروری ہے۔وزیر اعظم عمران خان نے کہا کہ افغانستان کی موجودہ صورتحال میں عالمی برادری کی مسلسل حمایت کی ضرورت ہے۔ افغانستان کے عوام کے ساتھ اظہار یکجہتی کرنا اور انسانی ہمدردی کے چیلنجز سے بچنے اور معاشی استحکام کو یقینی بنانے کے لیے ان کی مدد کرنا ناگزیر ہے۔وزیر اعظم نے کہا کہ پاکستان علاقائی اور بین الاقوامی شراکت داروں کے ساتھ قریبی رابطے میں رہے گا تاکہ افغانستان میں امن، استحکام اور ترقی کے مشترکہ مقاصد کو فروغ دیا جاسکے جس سے خطہ اور اس سے باہر کا علاقہ مستفید ہوگا۔وزیراعظم اور یورپی کونسل کے صدر نے اس بات پر اتفاق کیا کہ فریقین رابطے میں رہیں اور افغانستان کی صورتحال پر قریبی رابطہ رکھیں۔ وزیراعظم عمران خان نے یورپی کونسل کے صدر کو پاکستان کے دورے کی دعوت بھی دی۔
تازہ ترین خبروں کے لیے پی این آئی کا فیس بک پیج فالو کریں
