شہید ہونے والے کان کن سپردخاک ، نماز جنازہ میں شریک افراد نے’’وزیر اعظم عمران خان مردہ باد‘‘ کے نعرے لگا دئیے

اسلام آباد،کوئٹہ (پی این آئی)مچھ میں شہید ہونے والے 10کان کنوں کی نمازجنازہ ادا ئیگی کے بعد تدفین کردی گئی ،جنازے میں ہزارہ برادری کی بڑی تعداد شریک ہوئی ، اس موقع پر سکیورٹی کے سخت انتظامات کئے گئے تھے۔شہدا کی نماز جنازہ میں شرکت کرنے والوں نے”وزیراعظم مردہ باد اور صوبائی حکومت مردہ باد” کے نعرے بھی لگائے۔ شرکا نے باآواز بلند کہا کہ

دہشتگردی نہیں چلے گی۔شرکا نے کہا کہ ظالمو جواب دو ، خون کا حساب دو۔ شرکا کی جانب سے وزیراعظم مردہ باد کے نعرے لگائے جانے کی ویڈیو سوشل میڈیا پر بھی وائرل ہوئی۔واضح رہے کہ لواحقین اور ہزارہ برادری کے افراد گزشتہ 6 روز سے احتجاج پر تھے۔ گزشتہ روز تمام مطالبات تسلیم کرنے کی حکومتی یقین دہانی کے بعد ہزارہ برادری نے اپنا احتجاجی دھرنا ختم کرنے کا اعلان کیا تھا۔دریں اثنا معاون خصوصی وزیراعظم سید زلفی بخاری نے کہا ہے کہ ہزارہ شہدا کے لواحقین کا اپنے پیاروں کو اللہ کے سپرد کرنے کے فیصلے کا شکریہ ادا کرتے ہیں۔اپنے ٹوئٹرپیغام میں انہوںنے کہاکہ زندگی کے چند بہت مشکل اور دل دہلا دینے والے ایام ورثا کے ساتھ گزارے،یہ ہماری تاریخ کا انتہائی افسوس ناک واقعہ ہے۔زلفی بخاری نے لکھا کہ غم کی اس گھڑی میں ورثا کے ساتھ ہوں، تمام ورثا کے باصبر اور با ہمت رہنے کا شکریہ۔دوسری جانبچیف آف آرمی سٹاف جنرل قمر جاوید باجوہ نے بھی کوئٹہ کا دورہ کرنے کا فیصلہ کیا ہے اور آئندہ ایک دو روز میں وہ کوئٹہ جائینگے ۔ دفاعی ذرائع کے مطابق آرمی چیف بحرین کے تین روزہ سرکاری دورے پر تھے اور دورے سے واپسی پر انہوں نے سانحہ مچھ سے متعلق متعلقہ انٹیلی جنس و عسکری حکام سے بریفنگ لی ہے اور اس واقعہ سے متعلق ہونے والی اب تک کی تحقیقات سے ان کو آگاہ کیاگیا ہے ،ذرائع کا کہنا ہے کہ آرمی چیف آئندہ ایک دو روز میں کوئٹہ جائینگے جہاں پر وہ سدرن کمانڈ ہیڈکوارٹر میں اس واقعہ سے متعلق تفصیلی بریفنگ بھی لینگے اور ساتھ ہی ساتھ ہزارہ کمیونٹی سے تعلق رکھنے والے عمائدین سے بھی ملیںگے اور مستقبل میں ایسے واقعات کی روک تھام کیلئے یقینی بنانے کیلئے لائحہ عمل بھی طے کیاجائیگا ۔