صارفین کے لیے خوشخبری، ٹیکس میں کمی کا اعلان

ڈائریکٹوریٹ جنرل آف کسٹمز ویلیوایشن کراچی نے 62 اقسام کے پرانے اور استعمال شدہ برانڈڈ موبائل فونز کی درآمد کے لیے نئی کسٹمز ویلیوز مقرر کر دی ہیں۔ اس سلسلے میں ڈائریکٹوریٹ نے ویلیوایشن رولنگ نمبر 2035 آف 2026 جاری کی ہے۔

نئی ویلیوز کا اطلاق بغیر پیکنگ اور لوازمات کے کمرشل بنیادوں پر درآمد کیے جانے والے استعمال شدہ موبائل فونز پر ہوگا، جن میں چار برانڈز ایپل، سام سنگ، گوگل پکسل اور ون پلس شامل ہیں۔

حکام کے مطابق سابقہ ویلیوایشن رولنگ ڈیڑھ سال سے زائد پرانی ہو چکی تھی اور عالمی مارکیٹ کی موجودہ صورتحال کی عکاسی نہیں کر رہی تھی۔ اس دوران کئی نئے سمارٹ فون ماڈلز مارکیٹ میں آ چکے تھے، جبکہ متعدد پرانے ماڈلز اپنی مدت استعمال پوری کر چکے تھے، جس کے باعث ڈیپریسی ایشن میں تبدیلی ضروری ہو گئی تھی۔ اسی وجہ سے کسٹمز حکام نے کسٹمز ایکٹ 1969 کی دفعات 25 اور 25A کے تحت نئی ویلیوایشن کا عمل شروع کیا، کیونکہ درآمدی ڈیکلئیرڈ ویلیوز اور اصل عالمی قیمتوں کے درمیان واضح فرق پایا گیا تھا۔

نئی رولنگ کے تحت کسٹمز ڈیوٹیز اور ٹیکسز کا تعین کسٹمز کی مقررہ ویلیوز پر کیا جائے گا، چاہے استعمال شدہ فونز کی حالت یا گریڈ کچھ بھی ہو۔ رولنگ کے تحت آنے کے لیے ضروری ہوگا کہ درآمد کیے جانے والے استعمال شدہ موبائل فونز پاکستان برآمد کیے جانے سے کم از کم چھ ماہ قبل ایکٹیویٹ کیے جا چکے ہوں۔ درآمد کنندگان کو ایکٹیویشن کی مدت ظاہر کرنا ہوگی، جس کی تصدیق متعلقہ سیسنگ افسران کریں گے۔