ایمیزون نے بلیک فرائیڈے کے موقع پر اپنے 300 ملین سے زائد صارفین کو خبردار کیا ہے کہ وہ آن لائن خریداری کے دوران دھوکا دہی سے بچنے کیلئے خصوصی احتیاط برتیں۔ غیر ملکی میڈیا رپورٹس کے مطابق کمپنی کا کہنا ہے کہ بلیک فرائیڈے کے دوران اسکیمرز زیادہ فعال ہوجاتے ہیں، جس کے باعث لاکھوں صارفین کو جعلی پیغامات اور اشتہارات کے بارے میں آگاہ کرتے ہوئے ایک ای میل بھیجی گئی ہے۔
بھیجی گئی ای میل میں ان طریقوں کی نشاندہی کی گئی ہے جن کے ذریعے خریداروں کو نشانہ بنایا جا رہا ہے۔ ان میں غیر منقولہ فون کالز، مشکوک ای میلز اور ایسے پیغامات شامل ہیں جن میں صارفین سے ان کے اکاؤنٹ کی معلومات یا تصدیق طلب کی جاتی ہے۔
نیشنل ٹریڈنگ اسٹینڈرڈز کے مائیک اینڈریوز کے مطابق جعل ساز کرسمس کے دوران زیادہ سرگرم ہو جاتے ہیں کیونکہ یہ سال کا مصروف ترین وقت ہوتا ہے۔ این ٹی ایس نے خبردار کیا ہے کہ تقریباً 6.4 ملین صارفین جعلی اشتہارات پر کلک کرنے کے بعد رقم سے محروم ہوچکے ہیں۔
ایمیزون نے اپنی ای میل میں صارفین کو متعدد چیزوں سے خبردار کیا ہے جن میں ڈیلیوری یا اکاؤنٹ کے مسائل سے متعلق جعلی پیغامات، سوشل میڈیا پر فریق ثالث کی جانب سے ایسے اشتہارات اور سودے جو صارفین کو دھوکا دے سکیں، غیر سرکاری ذرائع سے آنے والے پیغامات جو پاس ورڈ یا ادائیگی کی معلومات مانگتے ہیں، اور غیر متعلقہ لنکس شامل ہیں جو صارفین کو جعلی ویب سائٹس کے ذریعے اکاؤنٹ کی تصدیق کیلئے مجبور کرتے ہیں۔
ایمیزون نے مشورہ دیا ہے کہ خریداری کیلئے براہ راست اپنی ویب سائٹ یا موبائل ایپ کا استعمال کیا جائے تاکہ اس طرح کی دھوکا دہی سے بچا جاسکے۔
تازہ ترین خبروں کے لیے پی این آئی کا فیس بک پیج فالو کریں
