پاکستان میں میٹا اے آئی اردو میں متعارف

پاکستان میں میٹا اے آئی کو اردو زبان میں متعارف کرا دیا گیا ہے، جس کے بعد پاکستانی صارفین اب انگریزی کے ساتھ ساتھ اردو میں بھی میٹا اے آئی سے بات چیت کر سکیں گے۔

میٹا نے وزارت انفارمیشن ٹیکنالوجی و ٹیلی کمیونیکیشن کے تعاون سے “Future in Focus: AI and Innovation” کے عنوان سے منعقدہ تقریب میں مصنوعی ذہانت کی تعلیم اور سرکاری ڈیجیٹل تبدیلی کے لیے ایک تجرباتی پروگرام کے آغاز کا بھی اعلان کیا۔ ان اقدامات کا مقصد پاکستان میں ڈیجیٹل ترقی کے عمل کو تیز کرنا ہے۔

کمپنی نے “Transforming Public Sector Innovation in Asia Pacific with Llama” کے رہنما دستاویز کا مقامی ایڈیشن بھی جاری کیا، جو Deloitte کے اشتراک سے تیار کیا گیا ہے۔ وزارت کی معاونت سے تیار کی گئی یہ گائیڈ وضاحت کرتی ہے کہ میٹا کا اوپن سورس اے آئی ماڈل Llama کس طرح سرکاری اداروں کے کام کو بہتر، عوامی خدمات کو مؤثر اور ڈیٹا خودمختاری کو مضبوط بنا سکتا ہے۔

یہ رہنما دستاویز ایشیا پیسیفک کے مختلف ممالک بشمول پاکستان کی کامیاب مثالوں پر مبنی بہترین طریقہ کار پیش کرتی ہے۔ میٹا نے ہائر ایجوکیشن کمیشن (HEC)، نیشنل کمپیوٹنگ ایجوکیشن ایکریڈیشن کونسل (NCEAC)، وزارت آئی ٹی اور atomcamp کے ساتھ مل کر AI Literacy Program کا آغاز بھی کیا ہے۔ اس پروگرام کے تحت مختلف یونیورسٹیوں کے 350 غیر کمپیوٹر سائنس اساتذہ کو مصنوعی ذہانت کی بنیادی مہارتیں سکھائی جائیں گی تاکہ وہ مستقبل کے طلبہ کو جدید تقاضوں کے مطابق تعلیم دے سکیں۔

اس کے علاوہ Government Digital Transformation Xperience (GDTX) 2025 پروگرام بھی شروع کیا گیا ہے، جس کا مقصد پاکستان کے سرکاری اداروں کو میٹا کی جدید ٹیکنالوجیز، حل اور بہترین طریقہ کار فراہم کرنا ہے۔ اس پروگرام کے ذریعے سرکاری و نجی شعبوں کے ماہرین کو ایک پلیٹ فارم پر اکٹھا کیا جائے گا تاکہ وہ ڈیجیٹل تبدیلی کے مؤثر طریقے اور تجربات کا تبادلہ کر سکیں۔

وفاقی وزیر برائے انفارمیشن ٹیکنالوجی شزہ فاطمہ نے تقریب سے خطاب میں کہا کہ وزیراعظم کے “ڈیجیٹل نیشن وژن” کے تحت پاکستان ایک ایسے مستقبل کی طرف بڑھ رہا ہے جہاں ٹیکنالوجی ہر شہری کو بااختیار بنائے گی۔ انہوں نے کہا کہ میٹا اے آئی میں اردو زبان کی شمولیت ایک اہم سنگ میل ہے جو ٹیکنالوجی کو زیادہ جامع اور قابلِ رسائی بنائے گی تاکہ کوئی بھی شہری ڈیجیٹل ترقی کے سفر سے پیچھے نہ رہ جائے۔

میٹا کے ڈائریکٹر پبلک پالیسی برائے جنوبی و وسطی ایشیا صارم عزیز نے کہا کہ میٹا عوامی شعبے اور تعلیمی اداروں کو مصنوعی ذہانت کے مؤثر استعمال کے ذریعے ڈیجیٹل تبدیلی میں مدد دینا چاہتا ہے، اور اردو زبان کی شمولیت سے پاکستانی صارفین کو اپنی زبان میں ٹیکنالوجی سے جڑنے کے مزید مواقع حاصل ہوں گے۔