نیٹ فلکس کے منافع میں اشتہارات اور سبسکرپشن کے باعث نمایاں اضافہ

امریکی آن لائن اسٹریمنگ پلیٹ فارم ’’نیٹ فلکس‘‘ نے 2025 کی دوسری سہ ماہی میں شاندار مالی کارکردگی کا مظاہرہ کیا،

جس دوران کمپنی کے منافع میں 45 فیصد اضافہ ریکارڈ کیا گیا۔ اس اضافے کی بڑی وجہ سبسکرپشن فیس میں اضافہ اور اشتہارات سے حاصل ہونے والی آمدنی بنی۔

خبررساں اداروں کے مطابق، نیٹ فلکس نے توقعات سے بہتر نتائج پیش کیے، جہاں کمپنی کی آمدنی 16 فیصد اضافے کے ساتھ 11.1 ارب ڈالر تک پہنچ گئی، جو نہ صرف ماہرین کے اندازوں بلکہ خود کمپنی کے تخمینے سے بھی زیادہ رہی۔ اس دوران نیٹ فلکس کا خالص منافع 3.1 ارب ڈالر رہا۔

کمپنی نے 2025 کے لیے اپنی سالانہ آمدنی کا ہدف بھی بڑھا دیا ہے، جو اب 44.8 ارب سے 45.2 ارب ڈالر کے درمیان متوقع ہے، جبکہ اس سے قبل یہ ہدف 43.5 ارب سے 44.5 ارب ڈالر تھا۔

نیٹ فلکس نے اس سہ ماہی میں اپنے مقبول ترین مواد، خاص طور پر ’’سکویڈ گیمز‘‘ کے تیسرے سیزن کو سراہا، جسے 122 ملین بار دیکھا گیا۔ کمپنی کے مطابق یہ نیٹ فلکس کی تاریخ کا چھٹا سب سے زیادہ دیکھا جانے والا سیزن ہے۔ کوریائی مواد کی مقبولیت نیٹ فلکس کی عالمی اسٹریٹجی کی کامیابی کو بھی ظاہر کرتی ہے۔

نیٹ فلکس نے لائیو پروگرامنگ میں بھی قدم رکھنے کا اعلان کیا ہے، جس میں باکسنگ میچز اور نیشنل فٹبال لیگ (NFL) کے گیمز شامل ہوں گے، تاکہ آن ڈیمانڈ انٹرٹینمنٹ سے ہٹ کر مواد کی نئی اقسام متعارف کرائی جا سکیں۔

رپورٹ کے مطابق، سال کے آغاز سے اب تک نیٹ فلکس کے حصص میں 40 فیصد سے زائد اضافہ ہو چکا ہے۔ کمپنی نے اپنی ایڈورٹائزنگ خدمات کو مزید وسعت دی ہے اور پیش گوئی کی ہے کہ 2025 میں اشتہارات سے حاصل ہونے والی آمدنی تقریباً دوگنا ہو سکتی ہے۔