واٹس ایپ میں ایک اور دلچسپ فیچر کا اضافہ‎

اسلام آباد(پی این آئی)جب سے واٹس ایپ میں میٹا اے آئی کو متعارف کرایا گیا، میسجنگ پلیٹ فارم میں آرٹی فیشل انٹیلی جنس (اے آئی) فیچرز پر کافی توجہ مرکوز کی جا رہی ہے۔

اب واٹس ایپ میں ایک اور اے آئی فیچر متعارف کرایا گیا ہے جس سے صارفین گروپ چیٹس کی پروفائل فوٹوز تیار کرسکیں گے۔WABetaInfo کی رپورٹ کے مطابق یہ نیا فیچر واٹس ایپ کے بیٹا (beta) ورژن میں متعارف کرایا گیا ہے۔پہلے خیال کیا جا رہا تھا کہ اس فیچر کو صارفین کی پرسنل پروفائل پکچرز کے لیے متعارف کرایا جائے گا۔

رپورٹ کے مطابق صارفین میٹا اے آئی کو استعمال کرکے منفرد گروپ چیٹ پروفائل فوٹوز تیار کرواسکیں گے۔یہ نیا اے آئی فیچر ان صارفین کے لیے زیادہ مددگار ثابت ہوگا جن کے لیے گروپ کے لیے موزوں تصویر تلاش کرنا مشکل ہوتا ہے۔اب یہ کام اے آئی ٹیکنالوجی خود ان کی ہدایات کے مطابق مکمل کرے گی خاص طور پر اگر وہ چیٹ گروپ کسی مخصوص تھیم کو مدنظر رکھ کر تیار کیا گیا ہوگا۔

ابھی یہ فیچر محدود صارفین کو دستیاب ہے مگر رپورٹ کے مطابق بہت جلد اسے تمام صارفین کے لیے متعارف کرائے جانے کا امکان ہے۔رپورٹ میں بتایا گیا کہ واٹس ایپ کی جانب سے میٹا اے آئی انٹر فیس کو بھی زیادہ یوزر فرینڈلی بنایا جا رہا ہے۔میٹا اے آئی کے نئے انٹرفیس میں مختلف ٹولز تک فوری رسائی کو یقینی بنایا جائے گا۔