پاکستان کے لیجنڈ ٹینس کھلاڑی اعصام الحق نے کیریئر کے آخری میچ کے بعد ریٹائرمنٹ کا اعلان کر دیا
اسلام آباد میں ہونے والے اے ٹی پی چیلنجر کپ کے مینز ڈبلز فائنل میں اعصام الحق نے مزمل مرتضیٰ کے ساتھ حریف پیئر کے خلاف مقابلہ کیا، جہاں انہیں اسٹریٹ سیٹ میں شکست کا سامنا کرنا پڑا۔ یہ میچ اعصام الحق کے پروفیشنل ٹینس کیریئر کا آخری مقابلہ تھا۔
اعصام الحق نے میچ کے بعد کہا کہ وہ حریف پیئر کو جیت پر مبارکباد پیش کرتے ہیں اور اپنے کیریئر میں سپورٹ کرنے والی فیملی اور دیگر افراد کے شکر گزار ہیں۔ انہوں نے مزید کہا کہ بطور صدر پاکستان ٹینس فیڈریشن وہ نوجوان کھلاڑیوں کے لیے ہر ممکن سہولیات فراہم کرنے کی کوشش کریں گے، اور اے ٹی پی ٹورنامنٹ کا پاکستان میں انعقاد ایک بڑی کامیابی رہی۔
اعصام الحق کے شاندار کیریئر میں ملک کے لیے 18 اے ٹی پی ورلڈ ٹور ٹائٹل، 28 اے ٹی پی چیلنجر ٹائٹل، 17 آئی ٹی ایف فیوچر ڈبلز ٹائٹل، اور سنگلز میں 5 آئی ٹی ایف ٹائٹل شامل ہیں۔ وہ ڈیوس کپ میں سنگلز، ڈبلز اور مجموعی طور پر سب سے زیادہ میچ جیتنے والے پاکستانی کھلاڑی بھی ہیں۔
کیریئر کے آخری میچ کے بعد تماشائیوں اور ساتھی کھلاڑیوں نے اعصام الحق کو خراجِ تحسین پیش کیا۔
تازہ ترین خبروں کے لیے پی این آئی کا فیس بک پیج فالو کریں
