ڈبلیو ڈبلیو ای کے مایہ ناز اور لیجنڈری ریسلر بل گولڈ برگ نے تقریباً 30 سال طویل شاندار ریسلنگ کیرئیر کے بعد باضابطہ طور پر ریٹائرمنٹ لے لی ہے۔
بل گولڈ برگ نے 12 جولائی کو اپنے آخری مقابلے میں ڈبلیو ڈبلیو ای ورلڈ ہیوی ویٹ چیمپئن گنٹھر کے خلاف رنگ میں اتر کر اپنے کیرئیر کو الوداع کہا۔ یہ یادگار مقابلہ ان کے آبائی شہر اٹلانٹا میں منعقدہ ’سنیچر نائٹ مین ایونٹ‘ کا حصہ تھا، جہاں وہ دوستوں کے ہمراہ رنگ میں داخل ہوئے، جبکہ کئی قریبی ساتھی شائقین میں موجود تھے۔
ورلڈ ہیوی ویٹ چیمپئن شپ کے اس مقابلے میں بل گولڈ برگ نے اپنے مشہور داؤ Spear اور Jackhammer کا استعمال کیا، تاہم گنٹھر نے انہیں Sleeper Submission موو کے ذریعے شکست دے دی۔ یہ مقابلہ 14 منٹ تک جاری رہا، جس کے بعد گولڈ برگ کے اہلِ خانہ اور دوست رنگ میں جمع ہوئے اور انہوں نے اپنا الوداعی خطاب کیا۔ اگرچہ یہ خطاب ٹی وی پر براہ راست نشر نہیں کیا گیا، لیکن بعد ازاں اس کی ویڈیو سوشل میڈیا پلیٹ فارم “ایکس” (سابق ٹوئٹر) پر جاری کی گئی۔
بل گولڈ برگ نے اپنا ریسلنگ کیرئیر 22 ستمبر 1997 کو ڈبلیو سی ڈبلیو (WCW) سے شروع کیا، جہاں وہ ابتدائی 173 مقابلے ناقابل شکست رہے اور WCW چیمپئن شپ بھی اپنے نام کی۔ انہیں پہلی شکست 27 دسمبر 1998 کو کیون نیش کے ہاتھوں ہوئی۔ بعد ازاں وہ کچھ عرصے تک آل جاپان پرو ریسلنگ سے منسلک رہے۔
سال 2003 میں گولڈ برگ نے ڈبلیو ڈبلیو ای میں شمولیت اختیار کی اور ایک سال کے دوران ورلڈ ہیوی ویٹ چیمپئن بنے۔ 2004 کے بعد وہ کچھ عرصے کے لیے منظر سے ہٹ گئے لیکن 2015 میں ’دی لیجنڈز آف ریسلنگ‘ شو کے ذریعے دوبارہ جلوہ گر ہوئے۔
2016 میں گولڈ برگ نے ایک بار پھر ڈبلیو ڈبلیو ای میں واپسی کی اور بروک لیسنر کو صرف 1 منٹ 26 سیکنڈز میں شکست دی۔ بعد ازاں وہ 2017 کے ’فاسٹ لین‘ ایونٹ میں یونیورسل چیمپئن بھی بنے، اگرچہ یہ ٹائٹل وہ ایک ماہ بعد بروک لیسنر کے ہاتھوں ہار گئے۔
گولڈ برگ وقفے وقفے سے ڈبلیو ڈبلیو ای میں واپسی کرتے رہے اور ایک موقع پر دوبارہ یونیورسل چیمپئن شپ اپنے نام کی۔ ان کا نام ریسلنگ کی تاریخ میں ناقابل فراموش انداز میں درج ہو چکا ہے۔
تازہ ترین خبروں کے لیے پی این آئی کا فیس بک پیج فالو کریں
