معروف صوفی گلوکارہ عابدہ پروین کے انتقال سے متعلق سوشل میڈیا پر پھیلنے والی خبریں بے بنیاد اور جھوٹی ثابت ہوئیں۔ ان افواہوں کی تردید خود عابدہ پروین کی بیٹی نے کرتے ہوئے واضح کیا ہے کہ ان کی والدہ خیریت سے ہیں اور بالکل صحت مند ہیں۔
عابدہ پروین کی بیٹی کا کہنا تھا کہ لیجنڈری گلوکارہ کے انتقال کی خبریں سراسر غلط اور گمراہ کن ہیں۔ انہوں نے وضاحت کی کہ لاہور کے علاقے دلگران چوک میں ایک خاتون کا انتقال ہوا تھا جن کا نام بھی عابدہ پروین تھا، جس کے باعث غلط فہمی نے جنم لیا۔ انہوں نے کہا کہ ان جھوٹی اطلاعات نے مداحوں کو غیر ضروری تشویش میں مبتلا کیا، جبکہ حقیقت اس کے برعکس ہے۔ ان کے مطابق عابدہ پروین مکمل صحت کے ساتھ اپنی معمول کی زندگی گزار رہی ہیں۔
عابدہ پروین کی بیٹی نے عوام سے اپیل کی کہ وہ سوشل میڈیا پر گردش کرنے والی افواہوں پر کان دھرنے کے بجائے صرف مستند اور قابلِ اعتماد ذرائع سے ہی معلومات حاصل کریں۔ ان جھوٹی خبروں کے باعث نہ صرف پاکستان بلکہ بیرونِ ملک بھی موجود عابدہ پروین کے مداحوں میں شدید بے چینی پھیل گئی، جس پر خاندان نے میڈیا اور عوام سے درخواست کی کہ غیر مصدقہ اطلاعات پھیلانے سے گریز کریں اور فنکارہ اور ان کے اہلِ خانہ کی نجی زندگی کا احترام کریں۔
واضح رہے کہ عابدہ پروین پاکستان کی عظیم ترین صوفی گلوکاراؤں میں شمار ہوتی ہیں اور دنیا بھر میں ان کے کروڑوں مداح موجود ہیں۔
تازہ ترین خبروں کے لیے پی این آئی کا فیس بک پیج فالو کریں
