معروف گلوکار اور ریپر طلحہٰ انجم نے نیپال میں اپنے کنسرٹ کے دوران بھارتی پرچم لہرانے کے واقعے پر معافی مانگ لی ہے۔ نجی ٹی وی کے پروگرام میں انہوں نے وضاحت دی کہ اگر ان کے عمل سے کسی کی دل آزاری ہوئی ہے تو وہ اس کے لیے معذرت خواہ ہیں، لیکن یہ کہنا غلط ہے کہ انہوں نے پوری پرفارمنس کے دوران بھارتی پرچم لہرایا۔
طلحہ انجم نے بتایا کہ کنسرٹ میں ہزاروں افراد موجود تھے جن میں بیسیوں کا تعلق بھارت سے بھی تھا، اور وہ تمام مداحوں کا احترام کرتے ہیں۔ سٹیج پر پرفارمنس کے دوران مداحوں کی جانب سے ٹی شرٹس اور دیگر اشیاء بھی پھینکی گئیں، اور اس دوران ایک مداح نے انہیں بھارتی پرچم تھمادیا۔ انہوں نے اس پرچم کو احترام کے طور پر تھاما اور کچھ دیر کے بعد واپس رکھ دیا۔
گلوکار نے کہا کہ وہاں صرف ایک بھارتی مداح نہیں تھا بلکہ درجنوں بھارتی مداح موجود تھے، اور وہ مداح کی جانب سے دیا گیا پرچم لے کر اسے پھینک نہیں سکتے تھے۔ انہوں نے وضاحت کی کہ وہ بالکل ہوش و حواس میں تھے اور پرچم کو کچھ دیر اپنے کندھے پر رکھا اور پھر لپیٹ کر اسٹیج پر رکھ دیا، تاہم سوشل میڈیا پر مختصر کلپ وائرل ہونے کی وجہ سے انہیں تنقید کا سامنا کرنا پڑا۔
طلحہ انجم نے اپنے اس عمل سے پاکستانی شائقین کی دل آزاری پر افسوس کا اظہار کیا اور قوم سے معافی مانگی۔
تازہ ترین خبروں کے لیے پی این آئی کا فیس بک پیج فالو کریں
