پاکستانی سینئر اور باصلاحیت اداکار انتقال کر گئے

پاکستان کے معروف اور باصلاحیت اداکار عزیر عباسی طویل علالت کے بعد انتقال کر گئے۔ وہ کئی دہائیوں تک پاکستانی ڈرامہ انڈسٹری سے وابستہ رہے اور اپنے منفرد اندازِ اداکاری کے باعث ناظرین کے دلوں میں گھر کر گئے۔

عزیر عباسی نے ڈرامہ سیریل “انتقام” میں رشید بابا کے کردار سے بےپناہ شہرت حاصل کی، جس نے اُنہیں گھر گھر پہچان دلائی۔ اُن کی شاندار اداکاری، نفیس اردو تلفظ اور کرداروں میں گہرائی پیدا کرنے کی صلاحیت نے اُنہیں ایک معتبر مقام بخشا۔ اُن کے نمایاں ڈراموں میں “کراچی ڈویژن” (2021)، “باشو” (2023)، “ہیر رانجھا” (2012) اور “کھلونا” شامل ہیں۔ فنکار گھرانے سے تعلق رکھنے والے عزیر عباسی کے بڑے بھائی زبیر عباسی معروف پروڈیوسر و ڈائریکٹر تھے، جبکہ وہ اداکار شمعون عباسی کے چچا تھے۔

شمعون عباسی نے اپنے چچا کے انتقال کی خبر سوشل میڈیا پر دیتے ہوئے گہرے دکھ کا اظہار کیا اور مداحوں سے دعا کی اپیل کی:”میرے پیارے چچا آج ہمیں چھوڑ کر چلے گئے، براہِ کرم اُن کی مغفرت کے لیے سورۃ الفاتحہ پڑھیں۔”