بالی وڈ کے معروف اداکار فیصل خان نے ایک بار پھر اپنے بڑے بھائی اور سپر اسٹار عامر خان پر سنگین اور چونکا دینے والے الزامات لگاتے ہوئے اعلان کیا ہے کہ وہ اپنے بھائی اور پورے خاندان سے تمام تعلقات ختم کر چکے ہیں۔
پریس کانفرنس کے دوران فیصل خان نے دعویٰ کیا کہ عامر خان نے شادی شدہ ہونے کے باوجود غیر ملکی صحافی جیسیکا ہائنز سے تعلقات قائم کیے، جن سے ان کا ایک ناجائز بیٹا بھی ہے۔ فیصل نے کہا کہ عامر ان الزامات کی تردید نہیں کر سکتے اور ان کی ذاتی زندگی کی جو تصویر عوام کے سامنے پیش کی جاتی ہے، وہ حقیقت کے برعکس ہے۔
فیصل خان نے مزید کہا کہ ان کے خاندان نے ان پر دوبارہ شادی کرنے کے لیے دباؤ ڈالا، جبکہ اس وقت عامر خان خود رینہ دتہ سے علیحدہ ہو کر جیسیکا ہائنز کے ساتھ تعلقات میں تھے۔ فیصل کے بقول، “میرا خاندان مجھ پر شادی کا دباؤ ڈال رہا تھا، لیکن میں نے انہیں سمجھایا کہ مجھے پہلے اپنی زندگی سنوارنی ہے۔”
اداکار نے الزام لگایا کہ ان کے خاندان نے انہیں ذہنی طور پر بیمار قرار دے کر زبردستی نفسیاتی علاج کے لیے بھیجا، انہیں نشہ آور ادویات دی گئیں اور تقریباً ایک سال تک گھر میں قید رکھا گیا۔ فیصل کے مطابق، ان کے بارے میں جھوٹا تاثر پھیلایا گیا کہ وہ دماغی طور پر کمزور ہیں۔
پریس کانفرنس کے دوران فیصل خان نے یہ بھی انکشاف کیا کہ ان کی بہن نے اس کانفرنس کو روکنے کی کوشش کی، مگر وہ اپنے مؤقف پر قائم رہے۔ انہوں نے اعلان کیا کہ وہ اب خاندان سے مکمل طور پر علیحدہ ہو چکے ہیں، والدین کی جائیداد میں اپنا حصہ نہیں لیں گے اور عامر خان سے کسی قسم کا مالی یا ذاتی تعلق نہیں رکھیں گے۔
بعد ازاں، انسٹاگرام پر ایک پوسٹ میں فیصل خان نے لکھا:
“دل شکستہ ہو کر میں نے اپنے پورے خاندان سے تعلقات ختم کرنے کا فیصلہ کیا ہے۔ یہ ایک مشکل قدم تھا، لیکن آگے بڑھنے کے لیے ضروری تھا۔ اب میں اپنی زندگی کے نئے باب کا آغاز سچائی اور مثبت سوچ کے ساتھ کروں گا۔”
تازہ ترین خبروں کے لیے پی این آئی کا فیس بک پیج فالو کریں
