بھارتی گینگسٹر لارنس بشنوی کے گروہ نے ایک بار پھر بالی ووڈ اسٹار سلمان خان کو دھمکی دیتے ہوئے خبردار کیا ہے کہ جو بھی ہدایتکار، پروڈیوسر یا اداکار ان کے ساتھ کام کرے گا، وہ اپنی جان کا خود ذمہ دار ہوگا۔
بھارتی میڈیا کے مطابق یہ دھمکی کینیڈا میں کپل شرما کے کیفے “کپس کیفے” پر فائرنگ کے ایک روز بعد سامنے آئی۔ ایک آڈیو پیغام میں خود کو ہیری باکسر کہنے والے شخص نے فائرنگ کی ذمہ داری قبول کرتے ہوئے سلمان خان سے وابستہ ہر فرد کو نشانہ بنانے کی وارننگ دی۔
فائرنگ کا واقعہ سرے، برٹش کولمبیا میں پیش آیا، جہاں ایک ماہ کے دوران کیفے پر یہ دوسرا حملہ تھا۔ خوش قسمتی سے دونوں واقعات میں کوئی جانی نقصان نہیں ہوا، تاہم عمارت کو نقصان پہنچا اور عملہ شدید خوف و ہراس کا شکار ہو گیا۔
واضح رہے کہ لارنس بشنوی گینگ سلمان خان کو 1998ء کے کالے ہرن شکار کیس کی وجہ سے نشانہ بنا رہا ہے، کیونکہ بشنوی برادری کالے ہرن کو مقدس جانتی ہے۔
کینیڈا میں لارنس بشنوی نیٹ ورک کی بڑھتی ہوئی مجرمانہ سرگرمیوں کے باعث مقامی حلقوں کی جانب سے اسے دہشتگرد تنظیم قرار دینے کے مطالبات میں تیزی آ گئی ہے۔
تازہ ترین خبروں کے لیے پی این آئی کا فیس بک پیج فالو کریں
