پاکستان کی معروف اداکارہ صبا قمر کی شوٹنگ کے دوران اچانک طبیعت خراب ہو گئی، جس پر انہیں فوری طور پر قائداعظم انٹرنیشنل اسپتال، راولپنڈی منتقل کیا گیا۔
میڈیا رپورٹس کے مطابق اداکارہ کو انتہائی نگہداشت وارڈ (آئی سی یو) میں داخل کیا گیا، جہاں ڈاکٹروں نے فوری طبی اقدامات کیے، جن میں انجیوگرافی بھی شامل تھی۔ ڈاکٹروں کے مطابق اسپتال پہنچنے کے وقت صبا قمر کی حالت انتہائی تشویشناک تھی اور اگر بروقت طبی امداد نہ دی جاتی تو جان کو خطرہ لاحق ہو سکتا تھا۔ تاہم فوری علاج اور مکمل نگرانی کے بعد ان کی حالت میں بہتری آئی اور انہیں وی آئی پی روم منتقل کر دیا گیا۔
ذرائع کا کہنا ہے کہ صبا قمر ایک بڑے پروجیکٹ پر متواتر کام کر رہی تھیں اور شدید ذہنی دباؤ اور نیند کی کمی کا شکار تھیں، جس کے باعث ان کی طبیعت بگڑی۔ ڈاکٹروں نے اداکارہ کو چند ہفتے آرام کرنے اور جسمانی مشقت سے اجتناب کرنے کی ہدایت کی ہے تاکہ وہ مکمل صحت یاب ہو سکیں۔ ان کی حالت بہتر ہونے پر انہیں اسپتال سے ڈسچارج کر دیا گیا۔
صبا قمر نے انسٹاگرام پر اپنی ڈاکٹرز کی ٹیم کے ساتھ تصویر شیئر کرتے ہوئے مداحوں کی محبت اور دعاؤں پر شکریہ ادا کیا۔ اپنی انسٹا اسٹوری میں انہوں نے کہا:’’سب کے پیار اور دعا کا بےحد شکریہ، میں بالکل ٹھیک ہوں اب۔ بس تھوڑا سا بریک لیا تھا، اب واپسی ایسے ہی ہوگی جیسے کبھی گئی ہی نہ تھی، اور نہ ہی میں کہیں جارہی ہوں۔‘‘ صبا قمر کے مداحوں اور شوبز شخصیات کی جانب سے ان کی جلد صحتیابی کے لیے نیک تمناؤں اور دعاؤں کا سلسلہ سوشل میڈیا پر جاری ہے۔
تازہ ترین خبروں کے لیے پی این آئی کا فیس بک پیج فالو کریں
