اسلام آباد کی سیشن عدالت نے یوٹیوب چینلز کی بندش کے عدالتی فیصلے کے خلاف اپیلوں پر سماعت کرتے ہوئے 27 میں سے مزید 5 یوٹیوب چینلز کی بندش کا حکم معطل کر دیا ہے۔ واضح رہے کہ گزشتہ روز بھی دو یوٹیوب چینلز کی بندش کا حکم معطل کیا گیا تھا۔
تفصیلات کے مطابق ایڈیشنل ڈسٹرکٹ اینڈ سیشن جج افضل مجوکہ نے کیس کی سماعت کی، جس کے دوران عدالت نے نیشنل سائبر کرائم انویسٹی گیشن ایجنسی کو نوٹس جاری کرتے ہوئے 21 جولائی تک جواب طلب کر لیا۔
یاد رہے کہ اس سے قبل جوڈیشل مجسٹریٹ عباس شاہ نے ایف آئی اے کی درخواست پر 27 یوٹیوب چینلز کو بلاک کرنے کا تحریری حکم جاری کیا تھا۔ دو صفحات پر مشتمل حکم نامے میں عدالت نے مؤقف اختیار کیا تھا کہ شواہد کی روشنی میں یہ معاملہ پیکا ایکٹ اور تعزیرات پاکستان کے تحت قابل سزا جرم بنتا ہے۔
عدالتی فیصلے میں یوٹیوب کے افسر انچارج کو حکم دیا گیا تھا کہ وہ درج شدہ تمام 27 یوٹیوب چینلز کو مکمل طور پر بند کرے۔
بند کیے جانے والے چینلز میں مطیع اللہ جان، صابر شاکر، عبدالقادر، حیدر مہدی، عمران ریاض، اوریا مقبول جان، مخدوم شہاب الدین، وجاہت سعید خان، ساجد گوندل، اسد طور، صدیق جان، پاکستان تحریک انصاف، نیا پاکستان، اور ڈیلی قدرت سمیت دیگر معروف چینلز شامل تھے۔
تازہ ترین خبروں کے لیے پی این آئی کا فیس بک پیج فالو کریں
