بالی وڈ اداکار، جس کی صرف 5 فلموں کا بزنس 2200 کروڑ روپے۔۔۔۔۔۔۔۔۔۔۔۔۔ گزشتہ سالوں کے دوران بالی وڈ کنگ شاہ رخ خان اور رجنی کانت جیسے سپر اسٹارز نے باکس آفس پر راج کیا اور ان کی فلموں نے کھڑکی توڑ کمائی کی۔
لیکن کیا آپ جانتے ہیں کہ ایک اسٹار ایسا بھی ہے جس کی فلموں نے آمدنی کے لحاظ سے کئی بڑے اسٹارز کو پیچھے چھوڑ دیا؟ دلچسپ بات یہ ہے کہ اس اداکار کو بھارت کے سب سے چھوٹے اداکار (indian shortest actor) کے طور پر بھی جانا جاتا ہے کیوں کہ اس کا قد صرف 4 فٹ 8 انچ ہے۔ بھارتی میڈیا رپورٹ کے مطابق 27 سالہ جعفر صادق 5 سال سے بھارتی انڈسٹری کا حصہ ہیں، جعفر صادق شروعات میں تامل انڈسٹری میں ڈائریکٹرز کی پہلی پسند بن کر ابھرے۔
جعفر صادق نے بطور ڈانسر کیرئیر کا آغاز کیا اور پھر اداکار کمل ہاسن کی فلم ’ وکرم‘ میں کیے گئے ایک چھوٹے سے کردار سے انڈسٹری میں قدم جمائے، اس فلم کی کامیابی سے جعفر صادق کو شہرت حاصل ہوئی جس کے بعد اداکار کو رجنی کانت کی فلم ‘جیلر ‘ میں دیکھا گیا جو ان کی پہلی فلم سے بھی زیادہ ہٹ رہی۔ 2023 میں انہوں نے شاہ رخ خان کی فلم ’جوان‘ سے بالی وڈ میں اینٹری دی اور ان کی آخری آن اسکرین فلم ’بے بی جوہن‘ تھی۔
اپنے مختصر فلمی کیریئر میں جعفر صادق کو ولن اور گینگسٹرز جیسے کرداروں کے طور پر جانا جاتا ہے، اگرچہ جعفر صادق نے فلموں میں مختصر کردار نبھائے لیکن ان کی فلمیں بزنس کے لحاظ سے کافی کامیاب رہیں۔ان کی پہلی فلم’ وکرم‘ نے عالمی سطح پر 414 کروڑ بھارتی روپے، رجنی کانت کی فلم’ جیلر‘ نے 650 کروڑ بھارتی روپے کمائے اور سال کی سب سے زیادہ بزنس کرنے والی فلم کا اعزاز بھی حاصل کیا۔ جس کے بعد جعفر صادق کی بالی وڈ ڈیبیو فلم ’جوان‘ نے بھی بزنس کے تمام ریکارڈ توڑتے ہوئے 1150 کروڑ بھارتی روپے کمائے، مجموعی طور پر ان کی 5 فلمیں باکس آفس پر اب تک 2200 کروڑ سے زیادہ کا بزنس کرچکی ہیں۔
اس عرصے کے دوران پربھاس، رجنی کانت، سنی دیول یا رنبیر کپور جیسے سپر اسٹارز کی فلموں نے بھی باکس آفس پر اتنا زیادہ بزنس نہیں کیا۔یاد رہے کہ آج بھی ان سب اداکاروں میں سر فہرست کنگ شاہ رخ خان ہیں، جن کی 2023 میں 3 فلمز ریلیز ہوئیں ، ان فلموں کا مجموعی بزنس 2600 کروڑ روپے تھا۔
تازہ ترین خبروں کے لیے پی این آئی کا فیس بک پیج فالو کریں
