سونو نگم کے کنسرٹ میں پتھر اور بوتلیں چل گئیں

معروف بھارتی گلوکار سونُو نِگم کو دہلی ٹیکنالوجیکل یونیورسٹی کے سالانہ فیسٹیول میں ناخوش گوار صورتِ حال کا سامنا کرنا پڑ گیا۔

تقریب کے دوران 1 لاکھ سے زائد افراد پر مشتمل ہجوم نے اسٹیج کی جانب پتھر اور بوتلیں پھینکنا شروع کر دیں۔اس موقع پر سونُو نِگم نے صورتِ حال کو قابو میں لانے کی کوشش کی اور حاضرین کو پرامن رہنے کی تلقین کی۔ انہوں نے کہا کہ میں آپ کے لیے یہاں آیا ہوں تاکہ ہم سب اچھا وقت گزار سکیں، میں آپ کو لطف اندوز ہونے سے منع نہیں کر رہا، لیکن براہِ کرم ایسا نہ کریں۔

ہجوم کی طرف سے پھینکی گئی اشیاء سے ان کی ٹیم کے کچھ افراد کو چوٹیں بھی آئیں، جس پر سونُو نِگم نے واضح کیا کہ اس طرح کی حرکتیں نہ صرف ناقابلِ قبول ہیں بلکہ خطرناک بھی ثابت ہو سکتی ہیں۔سوشل میڈیا پر اس واقعے کی کئی ویڈیوز وائرل ہو رہی ہیں، جن میں سونُو نِگم اپنے مشہور گانے پیش کرتے نظر آ رہے ہیں۔ ان ویڈیوز میں ایک دلچسپ لمحہ بھی سامنے آیا جب کسی نے اسٹیج پر پِنک بنی بینڈ پھینکا، جسے سونُو نِگم نے پہن لیا۔ اس کے بعد ہجوم میں موجود افراد پُوکی پُوکی کے نعرے لگانے لگے۔

واضح رہے کہ یہ پہلا موقع نہیں جب سونُو نِگم کو کنسرٹ کے دوران بدتمیزی اور بدانتظامی کا سامنا کرنا پڑا ہو، گزشتہ ماہ کولکتہ میں ہونے والے ایک کنسرٹ کے دوران بھی ہجوم بے قابو ہو گیا تھا۔حال ہی میں سونُو نِگم نے انٹرنیشنل انڈین فلم اکیڈمی (IIFA) پر تنقید کی تھی، کیونکہ انہیں اس سال کے ایوارڈز میں نامزد نہیں کیا گیا تھا۔