بانی پی ٹی آئی کا ہمشکل کون؟ سوشل میڈیا صارفین جان کر حیران رہ گئے

اسلام آباد(پی این آئی)معروف دلفریب ماڈل و اداکار عماد عرفانی کو پاکستان تحریکِ انصاف کے بانی و کرکٹ کی دنیا کے سپر اسٹار عمران خان کی بائیوپک میں کاسٹ کرنے پر زور دیا جانے لگا۔

سال 2013 میں ڈراما سیریل ’آسمانوں پر لکھا’ سے اداکاری کا سفر شروع کرنے والے عماد عرفانی نے اپنے کرئیر کے مختصر عرصے میں ہی جاندار اداکاری سے لوگوں کے دل جیتے ، عماد عرفانی کو پہلے ایک بہترین ماڈل کے طور پر جانا جاتا تھا لیکن گزشتہ سال وہ ڈراما ’کبھی میں کبھی تم‘ میں ’عدیل‘ کا کردار نبھانےکے سبب ایک بہترین اداکار کے طور پر ابھر کر سامنے آئے ہیں۔ عماد عرفانی کے دیگر مشہور ڈراموں میں ‘چیخ’ ، ‘جلن’ ، ‘سایۂ دیوار بھی نہیں’ ، ‘ماہِ تمام’ اور ‘کچھ نہ کہو’ شامل ہیں۔

ان دنوں وہ ایک نیا لُک لے چکے ہیں اور انسٹاگرام پر اس نئے لُک میں لی گئیں تصاویر شیئر بھی کر رہے ہیں، عماد عرفانی نے اپنے بال لمبے کر لیے ہیں اور ساتھ ہی چہرے پر ہلی شیو بھی رکھی ہوئی ہے۔اگرچہ عماد عرفانی گزشتہ ماہ سے اس لُک میں نظر آرہے تھے لیکن انکا ایک نیا فوٹوشوٹ عمران خان کے فینز کو بڑی تعداد میں متوجہ کرگیا کیونکہ ان تصاویر میں فینز کو عماد عرفانی میں وہ خود کم اور عمران خان زیادہ نظر آئے۔

عماد عرفانی سیاہ لانگ کوٹ، مفلر اور سیاہ گوگلز پہنے پوز دیتے دکھے جبکہ ایک بینچ پر بیٹھے لی گئی انکی تصویر تو عمران خان کی ہی تصویر معلوم ہورہی ہے,پوسٹ کے کمنٹ سیکشن میں فینز نے ان تصاویر کو عمران خان کی تصاویر اور عماد عرفانی کو انکا ہمشکل قرار دیا۔کمنٹ سیکشن میں ہی پاکستانی مداحوں نے اپنی خواہش کا اظہار کیا ہے کہ معروف اداکار عماد عرفانی کو سابق وزیراعظم پاکستان عمران خان کی بائیوپک میں کاسٹ کیا جائےکیونکہ وہ عمران خان سے ملتے جلتے ہیں اور ان کا انداز بھی عمران خان سے کافی مماثلت رکھتا ہے۔