طوبیٰ انور کا ذاتی نمبر لیک ہو گیا، کیسے کیسے پیغامات موصول ہورہے ہیں؟ برس پڑیں

کراچی (پی این آئی) اداکارہ طوبیٰ انور نے انکشاف کیا ہے کہ کسی نے ان کا موبائل نمبر لیک کردیا ہے جس کے بعد انہیں نفرت انگیز اور غیر اخلاقی پیغامات موصول ہورہے ہیں۔طوبیٰ انور نے انسٹاگرام پر سٹوریز پوسٹ کیں اور بتایا کہ انہیں واٹس ایپ پر متعدد نمبرز سے غلط پیغامات بھیجے جارہے ہیں جس کی وجہ سے وہ کافی پریشان ہیں۔

اداکارہ نے لکھا کہ ‘کسی نامعلوم شخص نے میرا نمبر لیک کردیا ہے جس کے بعد مجھے سیکڑوں کی تعداد میں فحش اور غیر اخلاقی پیغامات بھیجے جارہے ہیں، مجھے حیرانی ہے کہ کیسے لوگ ان سب فضول چیزوں کے لیے وقت اور توانائی ضائع کرتے ہیں’۔اداکارہ نے لکھا کہ ‘مجھے ملنے والے پیغامات اس قدر غلیظ ہیں کہ میں انہیں یہاں شیئر بھی نہیں کرسکتی، میں پچھلے کئی ماہ سے یہ سب برداشت کررہی ہوں، یہ حرکت دوسروں کو پریشان کرنے والی ہے۔طوبیٰ نے خوفزدہ ہوتے ہوئے کہا کہ ‘مجھے ڈر ہے کہ کہیں کوئی میرا نمبر ٹریس کرکے میرے گھر تک نہ پہنچ جائے اور مجھے کوئی نقصان نہ پہنچا دے، یہ سب حد سے زیادہ پریشان کن اور تکلیف دہ ہے’۔طوبیٰ انور نے نمبر لیک کرنے والے کے لیے کہا کہ ‘جس کسی نے بھی بدلے، تفریح یا نفرت کی آگ میں آکر یہ حرکت کی ہے وہ یہ جان لے کہ یہ دوسروں کے لیے بہت زیادہ پریشانی کا باعث ہوسکتا ہے’۔انہوں نے مزید لکھا کہ ‘دوسروں کی ذاتی معلومات شیئر کرکے انہیں ہراساں کرنا بند کریں’۔یاد رہے کہ طوبیٰ انور نے شہرہ آفاق ٹی وی میزبان عامر لیاقت سے 2018 ءمیں خفیہ شادی کی تھی جس کا اعلان عامر لیاقت نے 2020ء میں کیا تھا۔دونوں کے درمیان 2021 ءمیں اختلافات کی خبریں سامنے آئی تھیں، بعدازاں فروری 2022ءمیں طوبٰی انور نے عامر لیاقت سے خلع لینے کی تصدیق کی تھی۔