لاہور (پی این آئی) خاتون ٹک ٹاکر کیس میں گرفتار ملزم ریمبو نے عائشہ پر الزام عائد کیا ہے کہ وہ مقدمے کے ملزمان سے پیسے لینا چاہتی تھیں۔گریٹر اقبال پارک واقعے کے کیس میں پیشی کے دوران احاطہ عدالت میں میڈیا سے گفتگو کرتے ہوئے ملزم ریمبو نے کہا کہ کسی کی جان بچانے کی یہی سزا ملتی ہے اور سبق یہی ملتا ہے کہ کسی کا ساتھ نہیں دینا چاہیے۔انہوں نے کہا کہ دو ماہ سے عائشہ کا ساتھ دے رہے تھے،
مجھ سمیت گرفتار تمام افراد اس کیس کے گواہ بھی ہیں۔ملزم ریمبو کا کہنا تھا کہ عائشہ مقدمے کے ملزموں سے 5، 5 لاکھ روپے لینا چاہتی تھی جس پر انہیں کہا کہ رقم کے پیچھے نہ بھاگو ، سمجھانے پر عائشہ نے غلیظ زبان استعمال کی اور دھمکی دی کہ اگر اس کے مطابق بیان نہ دیا تو جیل کی ہوا کھانی پڑے گی۔ملزم نے مزید کہاکہ عائشہ نے نہ جانے کیوں مجھے میڈیا پر بھائی بنایا،مجھے نہیں پتہ کہ گھبرا کر مجھے بھائی بولا۔دوسری جانب آئی جی پنجاب رائو سردار نے مینار پاکستان واقعے کے مرکزی ملزم عامر سہیل عرف ریمبو کی ویڈیو وائرل ہونے کا نوٹس لے لیا۔پولیس نے ذمہ دار 4 اہلکاروں کے خلاف 155 سی کے تحت مقدمہ درج کرکے انہیں گرفتار کرلیا۔ ایف آئی آر میں انچارج انویسٹی گیشن ، مہرر انویسٹی گیشن ، محرر آپریشن اور ڈرائیور انویسٹی گیشن لاری اڈا کو نامزد کیا گیا ہے۔ نئے تعینات ہونے والے انچارج انویسٹی گیشن حسن عسکری کی جانب سے تمام نامزد ملزمان کو گرفتار کر کے حوالات میں بند کر دیا گیا ہے۔
تازہ ترین خبروں کے لیے پی این آئی کا فیس بک پیج فالو کریں
