سینئر اداکارہ ثمینہ احمد کی ہالی وڈ میں انٹری ، شوٹنگ کے لیے کس ملک پہنچ گئیں؟

لاہور (آئی این پی)پاکستان کی سینئر اداکارہ ثمینہ احمد ہالی وڈ میں انٹری دینے کیلئے تیار ہیں۔تفصیلات کے مطابق گزشتہ برس سینئر اداکار منظر صہبائی سے رشتہ ازدواج میں منسلک ہونے والی پاکستان کی سینئر اداکارہ ثمینہ احمد ہالی وڈ میں انٹری دینے کیلئے تیار ہیں۔گزشتہ روز انسٹاگرام پر اداکار منظر صہبائی نے ایک پوسٹ شیئر کی جس میں انہوں نے مداحوں کو کورونا ویکسین لگوانے سے متعلق اطلاع دی اور مداحوں پر بھی ویکسین لگوانے

کے لیے زور دیا۔منظر صہبائی کی پوسٹ پر کمنٹ کرتے ہوئے روبینہ جاوید نامی صارف کی جانب سے پوچھا گیا کہ ثمینہ جی کہاں ہیں؟جس پر منظر صہبائی نے جواب دیتے ہوئے لکھا کہ ثمینہ ہالی وڈ سیریل کی شوٹنگ کیلئے تھائی لینڈ میں ہیں اور 6مئی کو واپس آئیں گی۔خیال رہے کہ مشہور و معروف اسٹیج پرفامر، ٹی وی ادکارہ، پروڈیوسر اور ڈائریکٹر ثمینہ احمد پاکستان کے متعدد مشہور ڈراموں میں کام کر چکی ہیں، ثمینہ احمد کے فن کے اعتراف میں حکومت پاکستان انہیں صدارتی تمغہ برائے حسن کارکردگی بھی عطا کر چکی ہے۔پاکستان شوبز انڈسٹری کی معروف اداکار جوڑی گزشتہ برس 4اپریل کو رشتہ ازدواج میں منسلک ہوئی تھی۔۔۔۔

ویکسین تنازعہ ،اداکارہ عفت عمر 10لوگوں کو ویکسین لگوا کر غلطی کا ازالہ کریں گی

کراچی(آئی این پی) اداکارہ و میزبان عفت عمر نے کہا ہے کہ ویکسین تنازع کے بعداپنی غلطی کے ازالے کے طور پر 10لوگوں کو کورونا ویکسین لگوائوں گی۔تفصیلات کے مطابق گزشتہ روز اداکارہ و میزبان عفت عمر نے سیاسی اثرو رسوخ استعمال کرکے وقت سے پہلے ہی کورونا ویکسین لگوالی تھی جس کی وجہ سے انہیں سوشل میڈیا پر شدید تنقید کا سامنا کرنا پڑا اور اس کے بعد ازالے کے طور پر انہوں نے 10لوگوں کو کورونا ویکسین لگوانے کا بھی کہا ہے۔ڈاکٹر فیصل بخاری نامی شخص نے عفت عمر کے ٹوئٹ پر انہیں مشورہ دیتے ہوئے کہا تھا کہ آپ کو معاف کردیا جائے گا اگر آپ ویکسین کا دوسرا ڈوز نہ لیں اور اپنی باری کا انتظار کریں جس پر اداکارہ عفت عمر نے اس شخص کو جواب دیتے ہوئے کہا میں ایسا ہی کروں گی اور 10 لوگوں کو کورونا ویکسین بھی لگوائوں گی۔عفت عمر کے معافی والے ٹویٹ پر بہت سارے کمنٹس آئے تھے جن میں سے کچھ لوگوں نے انہیں یہ شرمناک کام کرنے پر دوبارہ کھری کھری سنائیں جب کہ کچھ لوگوں نے ان کے معافی والے عمل کو سراہا۔ صارف نے عفت عمر سے کہا میں آپ کی اس حرکت پر اس لیے غصہ تھا کیونکہ میری والدہ کی عمر 76 برس ہے اور وہ کینسر کی مریضہ ہیں انہیں ابھی تک کورونا ویکسین نہیں لگی ہے۔ خیر آپ نے اپنی غلطی مان کر صحیح کیا۔عفت عمر نے صارف کی بات پر جواب دیاکہ میں حرکت پر پچھتارہی ہوں اور واقعی شرمندہ ہوں لیکن میں اپنی غلطی سدھاروں گی براہ مہربانی میری معذرت قبول کریں۔میں آپ کو یقین دلاتی ہوں کہ میں 10ضرورت مندوں کو ویکسین لگوائوںگی اور اپنی غلطی کا ازالہ کروں گی۔واضح رہے

کہ عفت عمر نے وفاقی وزیر ہائوسنگ اینڈ ورکس طارق بشیر چیمہ کی رہائشگاہ پر ویکسین لگوائی تھی اور صرف عفت عمر نے نہیں بلکہ وفاقی وزیر کے اہلخانہ نے بھی گھر پر کورونا ویکسین لگوائی تھی۔یاد رہے کہ تنازع ویکسین لگوانے پر نہیں تھا بلکہ تنازع کی اصل وجہ عمر تھی کیونکہ اس وقت صرف 60سال سے زائد عمر کے لوگوں اور صحت کے کارکنوں کو ہی ویکسین لگوانے کی اجازت تھی جبکہ عفت عمر سمیت طارق بشیر چیمہ کے گھر کے ان لوگوں نے بھی ویکسین لگوائی تھی جن کی عمر 60سال سے کم تھی۔۔۔۔۔