پاکستان کااہم بڑی تباہی سے بچ گیا، دہشت گردی کا بڑا منصوبہ ناکام بنا دیا گیا

سیکورٹی فورسز نے کراچی میں دہشتگردی کے ایک بڑے منصوبے کو ناکام بنا دیا ہے، جس کے دوران 2 ہزار کلوگرام سے زائد خطرناک دھماکا خیز مواد برآمد کیا گیا اور 3 مشکوک دہشتگردوں کو گرفتار کر لیا گیا۔

سی ٹی ڈی کے ڈی آئی جی اظفر مہیسر نے ایک پریس کانفرنس میں بتایا کہ ایک پریمپٹ انٹیلی جنس انفارمیشن پر کارروائی کرتے ہوئے دہشتگردوں کے بڑے منصوبے کو ناکام بنایا گیا۔ پہلے ایک ملزم کو گرفتار کیا گیا، جس کی تفتیش سے رہنمائی ملنے پر مزید دو افراد کو حراست میں لیا گیا۔ گرفتار شدہ افراد جلیل (فرید)، نیاز (کنگ) اور حمدان (فرید) ہیں۔

ان کا کہنا تھا کہ یہ گروہ شہر کے سویلین اہداف کو نشانہ بنانا چاہتا تھا۔ دھماکا خیز مواد افغانستان سے بلوچستان کے راستے کراچی لایا گیا تھا۔ اہلکاروں کے مطابق، بروقت کارروائی سے شہر کو بڑی تباہی سے بچا لیا گیا ہے۔

وزیر مملکت برائے داخلہ طلال چوہدری نے کہا کہ یہ کارروائی کامیاب رہی اور گرفتار شدہ مجید بریگیڈ سے تعلق رکھتے ہیں۔ ان کا نیٹ ورک بشیر زیب، کالعدم بی ایل اے اور مجید بریگیڈ سے جڑا ہوا ہے۔ انہوں نے زور دیا کہ کالعدم بی ایل اے اور بی ایل ایف افغانستان میں محفوظ ٹھکانوں کا استعمال کرتی ہیں، اور شواہد سے پتہ چلتا ہے کہ اس نیٹ ورک کو ہمسایہ ممالک سے آپریٹ کیا جا رہا تھا۔ انہوں نے رہائشی پراپرٹیز کے کرائے کے نظام پر سخت نگرانی کی ضرورت پر بھی زور دیا۔

سندھ کے وزیر اطلاعات شرجیل میمن نے سیکیورٹی فورسز کو مبارکباد دی اور کہا کہ دہشتگردوں کا بڑی تباہی پھیلانے کا منصوبہ تھا۔ انہوں نے کہا کہ بھارت پراکسی جنگ کے ذریعے پاکستان سے لڑنے کی کوشش کرتا ہے، لیکن ہر محاذ پر اس کی شکست ہوئی ہے۔