پنجاب حکومت نے سموگ میں اضافے کے پیش نظر شہریوں کے لیے احتیاطی ہدایات جاری کر دی ہیں۔ سموگ مانیٹرنگ سسٹم کے مطابق صبح 9 بجے لاہور کا ایئر کوالٹی انڈیکس (AQI) 123 ریکارڈ کیا گیا جو معتدل سطح پر ہے، تاہم ٹریفک کے بڑھتے دباؤ سے فضائی آلودگی میں معمولی اضافہ دیکھا گیا۔
محکمہ ماحولیات کے مطابق صبح کے اوقات میں درجہ حرارت کم ہونے اور گاڑیوں سے نکلنے والے دھوئیں کے باعث آلودگی زمین کے قریب جمع ہو جاتی ہے۔ شہریوں سے اپیل کی گئی ہے کہ وہ “کلین اینڈ گرین پنجاب” کے ویژن میں حکومت کا ساتھ دیں۔ وزیراعلیٰ مریم نواز کی ہدایت پر سموگ کنٹرول پلان پر عمل درآمد جاری ہے۔
ایڈوائزری میں کہا گیا ہے کہ شہری ٹریفک کے رش کے اوقات میں غیر ضروری سفر سے گریز کریں، گاڑیوں کی باقاعدہ مینٹیننس کروائیں، طویل سگنل پر انجن بند رکھیں اور ایندھن کے فضول استعمال سے پرہیز کریں۔ موٹر سائیکل سواروں کو خصوصی ماحولیاتی ماسک استعمال کرنے کا مشورہ دیا گیا ہے۔
مزید ہدایت کی گئی ہے کہ اسکولوں اور دفاتر کے اوقات میں معمولی ردوبدل کر کے ٹریفک کا دباؤ کم کیا جائے۔ سینئر صوبائی وزیر مریم اورنگزیب کے مطابق ٹریفک پولیس اور ضلعی انتظامیہ کو سڑکوں پر مؤثر مانیٹرنگ کی ہدایات جاری کر دی گئی ہیں تاکہ فضائی آلودگی میں کمی لائی جا سکے۔
تازہ ترین خبروں کے لیے پی این آئی کا فیس بک پیج فالو کریں
