وزیراعظم آزاد کشمیر کے امیدوار کا اعلان کل متوقع ہے، جہاں پیپلز پارٹی کی مشاورت آخری مرحلے میں داخل ہو چکی ہے۔ ذرائع کے مطابق وزیراعظم کے عہدے کے لیے چوہدری لطیف اکبر، چوہدری یاسین اور سردار یعقوب کے ناموں پر غور جاری ہے۔
پارٹی ذرائع کا کہنا ہے کہ امیدوار کے نام کا اعلان بلاول بھٹو زرداری کل ایک پریس کانفرنس میں کریں گے۔ اس موقع پر وہ آزاد کشمیر میں اِن ہاؤس تبدیلی کی وجوہات پر بھی روشنی ڈالیں گے۔
ذرائع کے مطابق اگر موجودہ وزیراعظم مستعفی نہ ہوئے تو پیپلز پارٹی ان کے خلاف تحریکِ عدم اعتماد پیش کرے گی۔
پارٹی کے اندر مختلف رہنماؤں کی حمایت کے لحاظ سے تقسیم دیکھی جا رہی ہے۔ چوہدری لطیف اکبر کو بلاول بھٹو اور مرکزی قیادت کا اعتماد حاصل ہے، جبکہ چوہدری یاسین کو فریال تالپور اور راجہ پرویز اشرف کی حمایت حاصل ہے۔ دوسری جانب سندھ اور پنجاب کے سینئر رہنما سردار یعقوب کے حق میں لابنگ کر رہے ہیں۔
ذرائع کے مطابق بلاول بھٹو پارٹی کے پرانے اور وفادار کارکن کو وزیراعظم کے عہدے پر دیکھنا چاہتے ہیں۔ چوہدری لطیف اکبر ماضی میں اسپیکر قانون ساز اسمبلی اور وزیر کے طور پر خدمات انجام دے چکے ہیں۔ سردار یعقوب کے بارے میں اعتراض یہ ہے کہ وہ اس سے قبل صدر اور وزیراعظم دونوں عہدوں پر رہ چکے ہیں، جبکہ چوہدری یاسین پر مسلم لیگ ن سے متعلق تحفظات اٹھائے جانے کا خدشہ ہے۔
پیپلز پارٹی کا ارادہ ہے کہ وہ مسلم لیگ ن کے ساتھ مشاورت کے بعد وزیراعظم آزاد کشمیر کے امیدوار کا نام فائنل کرے۔ اگر مسلم لیگ ن کی جانب سے کوئی اعتراض نہ کیا گیا تو چوہدری لطیف اکبر کو وزارتِ عظمیٰ کے لیے نامزد کیے جانے کا قوی امکان ہے۔
پارٹی ذرائع کے مطابق اسپیکر قانون ساز اسمبلی کے لیے فیصل راٹھور اور بازل نقوی کے ناموں پر بھی غور کیا جا رہا ہے۔
تازہ ترین خبروں کے لیے پی این آئی کا فیس بک پیج فالو کریں
