ضلع غذر کی تحصیل گوپس یاسین میں گلیشیئر پگھلنے کے باعث ہونے والی لینڈ سلائیڈنگ کی ابتدائی رپورٹ تیار کر لی گئی ہے۔ حکام نے رپورٹ اعلیٰ حکام کو ارسال کر دی ہے جبکہ متاثرہ افراد نے فوری امداد کی اپیل کی ہے۔
ایڈیشنل ڈپٹی کمشنر شیر افضل کے مطابق تالی داس، مڈوری، مولا آباد، ہاکس تھنگی، راؤشن اور گوتھ کے کئی دیہاتوں میں 330 گھروں کو شدید نقصان پہنچا ہے، جبکہ متعدد دکانیں بھی متاثر ہوئی ہیں۔ ان کا کہنا ہے کہ متاثرین کو خیموں، راشن اور دیگر بنیادی اشیاء کی فوری ضرورت ہے۔ غذر کے گاؤں راؤشن میں لینڈ سلائیڈنگ اور دریا کا بہاؤ رکنے سے عارضی جھیل بن گئی تھی جس میں اسپیل وے کھلنے کے بعد پانی کا اخراج جاری ہے۔ پانی کی سطح میں کمی آنے سے نچلے علاقوں میں کٹاؤ کا خطرہ کم ہوگیا ہے۔
اگر اسپیل وے نہ کھلتا تو ہزاروں مزید گھروں کے ڈوبنے کا خدشہ تھا۔ تاہم ڈوبے ہوئے گھروں سے پانی اترنے میں ابھی وقت لگے گا۔ ادھر، مقامی چرواہے وصیت خان نے متاثرہ علاقے کے عوام کو بروقت آگاہ کر کے سیکڑوں جانیں بچائیں۔ حکومت کی جانب سے ان کی حوصلہ افزائی کے لیے نقد انعام اور تعریفی سند دی گئی ہے۔
تازہ ترین خبروں کے لیے پی این آئی کا فیس بک پیج فالو کریں
