پاکستان تحریک انصاف کے رہنما اعجاز چوہدری کی جیل میں طبیعت ناساز ہو گئی، جس کے بعد انہیں فوری طور پر لاہور کے پاکستان کڈنی اینڈ لیور انسٹی ٹیوٹ (پی کے ایل آئی) منتقل کر دیا گیا۔
اعجاز چوہدری کے وکیل رانا مدثر ایڈووکیٹ کے مطابق ان کے گردوں میں انفیکشن ہے اور پتے میں سات پتھریاں پائی گئی ہیں، جس کی وجہ سے وہ شدید تکلیف میں مبتلا ہیں۔ وکیل کا کہنا ہے کہ بیماری کے باعث اعجاز چوہدری کا وزن اب تک 22 کلوگرام کم ہو چکا ہے، جبکہ اسپتال میں ان کے مختلف میڈیکل ٹیسٹ جاری ہیں۔
جیل حکام نے طبیعت بگڑنے پر فوری اقدام کرتے ہوئے انہیں اسپتال منتقل کیا۔ واضح رہے کہ اعجاز چوہدری نو مئی کے واقعات کے مقدمات میں کوٹ لکھپت جیل میں قید ہیں۔
یاد رہے کہ 22 جولائی کو لاہور کی انسداد دہشت گردی عدالت نے شیرپاؤ پل جلاؤ گھیراؤ کیس میں پی ٹی آئی رہنماؤں ڈاکٹر یاسمین راشد، میاں محمود الرشید، اعجاز چوہدری اور سرفراز چیمہ کو 10، 10 سال قید کی سزا سنائی تھی، جبکہ شاہ محمود قریشی اور دیگر ملزمان کو بری کر دیا گیا تھا۔
تازہ ترین خبروں کے لیے پی این آئی کا فیس بک پیج فالو کریں
